ՊՎԾ նախկին պետ Դավիթ Սանասարյանը առողջապահության նախարար Արսեն Թորոսյանին մեղադրել էր կոռուպցիոն գործարքների մեջ: Մասնավորապես նա նշել է, որ նախարարի ընտանիքին պատկանող բուժհաստատությանը տրամադրվել է շատ ավելի մեծ գումար, քան նախկինում: Այսօր ԱԺ-ում լրագրողներն այս մասին հարցրեցին Արսեն Թորոսյանին: Նա ի պատասխան վստահեցրեց. «Իմ ընտանիքը որեւէ բժշկական կենտրոն չունի: Գումարների տրամադրման գործընթացը հայտնի է բոլորին՝ պետպատվերի տրամադրման: Ինչ վերաբերում է մյուս մեղադրանքներին, երբ որ ես լսում էի, քիչ էր մնում մտածեի, միգուցե Ալ Կապոնեին հովանավորելու համար էլ ինձ մեղադրի Սանասարյանը: Ծիծաղով եմ մոտենում այդ մեղադրանքներին»:
Թե ինչո՞վ են պայմանավորված այդօրինակ մեղադրանքները, օրինակ, Դոն Պիպոյի հովանավորության մասին՝ նախարարը պատասխանեց. «Ասացի, էլի, Դոն Պիպոյի, Ալ Կապոնեի…ծիծաղում եմ»:
Անձնակա՞ն հարցեր ունեն՝ Թորոսյանը պատասխանեց, որ չի կարող պատկերացնել. «Ես մի անգամ մի հատ հանրային խորհուրդ տվել եմ իրեն, բայց ոնց որ չի ուզում օգտվել իմ խորհրդից»:
Նա վստահեցրեց, որ Սանասարյանի հետ անձնական խնդիրներ չունի. «Չենք շփվում իրար հետ, որ անձնական խնդիրներ ունենանք»:
Կարդացեք նաև
Հարցին՝ ճի՞շտ է, որ ձեր եւ Դավիթ Սանասարյանի ջրերը սկսեցին մի առվով չհոսել այն պահից, երբ ինչպես Սանասարյանն է ասում, ձեր մոտ ՊՎԾ-ն որոշեց ստուգումներ սկսել՝ նա պատասխանեց. «Ոչ, ճիշտ չէ»:
Արսեն Թորոսյանն ասաց, որ ինքը ցուցմունք է տվել, որովհետեւ վկայի կարգավիճակում կանչվել է, եթե դատարան էլ կանչեն՝ կգնամ:
Երբ հարցրեցինք, որ Սանասարյան-Թորոսյան այս առճակատումները կուսակցական կարգապահության առումով ճի՞շտ են՝ Արսեն Թորոսյանը պատասխանեց, որ չկա առճակատում, ոչ էլ կուսակցական կարգապահության հարց կա. «Ինքն է փորձում առճակատվի, ես ժպիտով եմ վերաբերվում»:
Հռիփսիմե ՋԵԲԵՋՅԱՆ
