Ռուսաստանի ռազմական ներկայության ուժեղացումը Հայաստանում, ինչպես պնդում է վրացական «Ռեզոնանսի» թերթը, «իրական վտանգ է» Վրաստանի համար, հաղորդում է Թբիլիսիում ռուսական «Վզգլյադի» թղթակիցը:
Պարբերականը նշում է, որ Ռուսաստանի և Վրաստանի միջև ռազմական առճակատման դեպքում Գյումրիում տեղակայված ռուսական 102-րդ ռազմաբազան «կգործարկվի Վրաստանի դեմ»:
Ռազմական վերլուծաբան Վախթանգ Մայիսայան թերթին ասել է, որ Վրաստանը դառնում է «հնարավոր թիրախ»՝ հաշվի առնելով ռուսական ռազմաբազայի տեղակայությունը:
«Նմանատիպ սխեմայով Ռուսաստանը գործում է նաև Աբխազիայում, այդպիսով Վրաստանը փաստացի հայտնվել է օղակի մեջ»,- կարծիք է հայտնել փորձագետը:
Կարդացեք նաև
Նա ենթադրում է, որ «Վրաստանի և Ռուսաստանի միջև նոր ռազմական գործողությունների դեպքում վտանգ կա, որ ռուսական զորքերը Հայաստանից կշարժվեն վրացական Սամցխե-Ջավախեթի շրջան և մուտք կգործեն Բորժոմիի կիրճ»:
Դրանից հետո, ըստ թերթի, ռուսական ուժերը կմիանան Աբխազիայում և Հարավային Օսիայում տեղակայված ռուս զինվորականներին:
«Առաջին հարվածը կհասցվի Թբիլիսիին, հետո, ամենայն հավանականությամբ Քութայիսի և Զուգդիդի ուղղությամբ, չի բացառվում նաև Բաթումին հարվածելու տարբերակը»,- ասել է փորձագետը:
Հիշեցնենք, օրերս աշխատանքային այցով Հայաստանում էր գտնվում Ռուսաստանի պաշտպանության նախարար Սերգեյ Շոյգուն:
Պատրաստեց՝ Վիկտորյա ԱՆԴՐԵԱՍՅԱՆԸ
