«Առավոտի» հետ զրույցում ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Նաիրա Զոհրաբյանն անդրադարձավ ԱԺ նախկին նախագահ Արա Բաբլոյանին առաջադրված մեղադրանքին` «իշխանության յուրացում» հոդվածով: Մեր զրուցակիցն ասաց՝ հասկանում է, որ քաղաքականությունը, հաճախ, ոչ բարոյական գործիքներով է ճանապարհ հարթում, բայց իր համար կան նորմեր, կարմիր գծեր, որոնց այն կողմ չի կարելի անցնել: Նա բացառում է, որ վարչապետ Նիկոլ Փաշինյանը տեղյակ է Արա Բաբլոյանի հետ կատարվածին. «Պարզապես, մարդիկ կան, ինչպես ժամանակին Սերժ Սարգսյանին, Ռոբերտ Քոչարյանին էին արջի ծառայություն մատուցում` փորձելով պավլիկմարոզովներ, տարատեսակ մանկուրտներից ավելի մանկուրտ լինել…»:
Բուն մեղադրանքի մասով էլ մեր զրուցակիցը ասաց`իրավաբաններից ճշտել է, նման մեղադրանք Հայաստանում որեւէ մեկին չի առաջադրվել եւ դա ենթադրում է 10-15 տարի ազատազրկում: Նաիրա Զոհրաբյանն ուզում է տեսնել դրա հիմքերը եւ զգուշացնում, որ այս իշխանությունը եւս հավերժ չէ եւ այդ մեղադրանք առաջադրողները նույնպես պատասխան են տալու:
Նելլի ԳՐԻԳՈՐՅԱՆ
«Առավոտ» օրաթերթ
30.10.2019
