«Ես համաձայնեցի լինել Հանրային խորհրդի նախագահ՝ վստահելով, որ նոր իրավիճակում իսկապես նոր բարեփոխումներ կսկսվեն, ես էլ կկարողանամ օգտակար լինել: Հիմա տեսնում եմ, որ երկիրն այդ ճանապարհով չի գնում: Խոստումների-հույսերի եւ իրականության միջեւ անհամապատասխանություն կա»,-«Մամուլի ազգային ակումբում» լրագրողների հետ հանդիպմանն այսօր անդրադառնալով փաստին, որ պատգամավոր Արման Բաբաջանյանը դիմել է վարչապետին՝ ՀԽ նախագահին պաշտոնանկ անելու պահանջով, ասաց ՀԽ նախագահ Վազգեն Մանուկյանը:
Նրա բնորոշմամբ. «Եթե իշխանությունը համաձայն չէ ինձ հետ եւ չի ուզում ինձ այդ պաշտոնում տեսնել, նշանակություն չունի, որ ինձ, ըստ օրենքի, մինչեւ ապրիլ չեն կարող հանել: Ցանկացած պահի վարչապետը կարող է ինձ հրավիրել, եւ զրուցենք: Թող ասի, որ չի ուզում: Եթե նման հարց կա, գուցե ես մոտ օրերս հանդիպեմ նրան եւ քննարկենք՝ իմ հետագա գործունեությունն իմաստ ունի՞, թե ոչ: Երբ առաջին անգամ հանդիպեցինք, նրան ասացի՝ իշխանությունը վերցրել ես, ժողովուրդը վստահում է, բայց ինչպե՞ս ես պատկերացնում մեր հարաբերությունները ՌԴ-ի հետ, կամ Արցախի հարցի լուծումը: Կցկտուր խոսակցություն ունեցանք, ասվեց, որ հետո էլի հանդիպենք, կխոսենք»:
https://www.facebook.com/aravot.am/videos/405961606738514/
Կարդացեք նաև
Հետո, Վազգեն Մանուկյանի խոսքով, քննարկել են տեսլականները. «Հանրային խորհրդի առնչությամբ պայմանավորվեցինք, որ երկու ամիսը մեկ ՀԽ-ն հանդիպի վարչապետին: Մի նման հանդիպում եղավ: Շատ հարցեր քննարկեցինք: Հաջորդը դեռ տեղի չի ունեցել»:
Ինչ վերաբերում է վարչապետին ուղղված նշյալ գրությունում Արման Բաբաջանյանի նկատառմանը, թե Մանուկյանը վերջին շրջանում կողմնակալ քաղաքական հայտարարություններ է անում, եւ որ նրա հիմնադրած «Վերնատուն» քաղաքական ակումբում հիմնականում նախկին իշխանության ներկայացուցիչներն են, Մանուկյանը նկատեց. «Ակումբը որոշումներ չի կայացնում, այն քննարկումների հարթակ է: Մարդկանց հնի եւ նորի չեմ բաժանում: Նախորդ իշխանության մեջ եղել են ոչ արժանավորներ եւ բարձր մակարդակի անձինք: Նույնը եւ նոր իշխանության մեջ: Հնի եւ նորի բաժանումը լավ չեմ հասկանում»:
Լուիզա ՍՈՒՔԻԱՍՅԱՆ
