«Պատգամավոր ունենք՝ ավելի շատ թռնում է, քան քայլում: Հանրությունը հարցնում է`էդ մարդու`երկրին տված օգուտը, ո՞րն է»,- Ազգային ժողովի ֆինանսավարկային եւ բյուջետային հարցերի ու պետական-իրավական հարցերի մշտական հանձնաժողովների համատեղ նիստում, 2020 թվականի պետական բյուջեի նախագծի քննարկման ժամանակ հարց հնչեցրեց ԲՀԿ խմբակցության պատգամավոր Գեւորգ Պետրոսյանը`հավելելով, որ պատգամավորների գործուղումների արդյունքը պետք է տեսանելի լինի: Նա կարծում է, որ մեխանիզմներ պետք է մշակվեն, ըստ որոնց գործուղումների արդյունքների վերաբերյալ պատգամավորները հաշվետվություններ կներկայացնեն:
Հարցը բարձրաձայնել էր «Իմ քայլը» խմբակցության պատգամավոր Արտակ Մանուկյանը`անդրադառնալով իրենց գործուղումների վերաբերյալ մամուլի հրապարակումներին: Նա ԱԺ աշխատակազմի ղեկավար, գլխավոր քարտուղար Տիգրան Գալստյանից հետաքրքրվեց`կա՞ համեմատական՝ մեկ պատգամավորի հաշվով միջին գործուղման ծախսը այս եւ նախորդ գումարման խորհրդարաններում, վեց ամսվա տվյալներով որքա՞ն է: Տիգրան Գալստյանը թիվ չնշեց, սակայն ասաց, որ այն նվազելու միտում ունի: Նաեւ հավելեց, որ գործուղումներին հատկացվող գումարները բացարձակ արժեքով ավելի են եղել այս տարի, քան նախորդ տարի էր. «Նաեւ նոր կարգավորում ենք ունենալու, որով հստակ երևում է, թե պատվիրակը երբ է մեկնում, երբ վերադառնում։ Այս պահի դրությամբ ունենք որոշակի բանավոր կարգավորումներ, իսկ փոփոխությունները հնարավորություն կտան հստակեցնել մեկնման եւ վերադարձի հետ կապված հարցերը»:
Տիգրան Գալստյանը նաեւ հավատացրեց, որ գործուղումների հետ կապված խիստ վերահսկողություն են սահմանում` սկսած տոմսերի գներից մինչեւ պատվիրակությունների ծրագրով պայմանավորված արտերկրում լինելու ժամանակահատվածը:
Ըստ նրա, նույն համեմատությամբ նվազել են նաեւ ներկայացուցչական ծախսերը. պատվիրակությունների ընդունման համար 40 միլիոն դրամով քիչ է եղել ծախսվել` 2018-ի նույն ժամանակահատվածի համեմատությամբ:
Կարդացեք նաև
«Կան պատգամավորներ, որոնք գործուղման չեն մեկնում, բայց աշխատանքի օգտակար գործողության գործակիցը շատ ցածր է»,- սա էլ Պետական-իրավական հարցերի հանձնաժողովի նախագահ Վլադիմիր Վարդանյանի տեսակետն է: Նա գտնում է, որ պատգամավորի աշխատանքի արդյունքը պետք է տեսանելի լինի:
Նելլի ԳՐԻԳՈՐՅԱՆ
