«Այդ գործով որեւէ մեկնաբանություն այս պահին չեմ անի, քրեական գործը երեկ ենք ստացել, դեռեւս ուսումնասիրում են»,- խորհրդարանում լրագրողների հետ զրույցում ասաց Հատուկ քննչական ծառայության պետ Սասուն Խաչատրյանն անդրադառնալով ՍԴ նախագահի նկատմամբ վարույթ ընդունված գործին:
Լրագրողի հարցին` Հրայր Թովմասյանին հարցաքննելու իրավունքի վերաբերյալ, ՀՔԾ պետը պատասխանեց. «Մենք հարցաքննելու իրավունք ունենք ցանկացած անձի»:
Սասուն Խաչատրյանը չի կիսում բազմաթիվ իրավաբանների տեսակետը, թե Հրայր Թովմասյանի նկատմամբ իրականացվողը քաղաքական հետապնդում է: Հիշեցնում է`ինքը բազմիցս էլ հայտարարել. «ՀՔԾ-ն քաղաքական վերահսկողությունից դուրս է աշխատում եւ ենթարկվում է միայն օրենքին»:
Լրագրողները հետաքրքրվեցին նաեւ ԱԺ աշխատակազմի ղեկավարի նախկին տեղակալ Արսեն Բաբայանին կալանավորելու անհրաժեշտությունից: Սասուն Խաչատրյանն ասաց`քննիչն է այդպես ճիշտ համարել: Նրա տեսակցությունների սահմանափակումը ՀՔԾ պետը նույնպես բացատրում է քննիչի որոշմամբ `նախաքննության շահերից ելնելով: Այդ նույն նկատառումներից ելնելով էլ, ըստ Սասուն Խաչատրյանի, Արսեն Բաբայանի տեսակցություններն ու հեռախոսազանգերն են սահմանափակվել. «Տվյալ դեպքում, գործը քննող քննիչը եկել է այն եզրահանգման, որ Արսեն Բաբայանի պատշաճ վարքագիծը կարող է ապահովել միայն կալանավորման պայմաններում: Հենց այս նկատառումներից էլ ելնելով արգելանք է դրվել նրա տեսակցությունների վրա: Այս դեպքը յուրահատուկ է հենց իրավական տեսանկյունից»:
Կարդացեք նաև
Հարցին՝ Արսեն Բաբայանը վտանգավոր հանցագո՞րծ է, Սասուն Խաչատրյանը պատասխանեց. «Հարցեր են տալիս, որոնք պատասխաններ չունեն»:
Իսկ Արսեն Բաբայանի անչափահաս երեխաների տեսակցությունը չթույլատրելու մասին տեղեկություն, Սասուն Խաչատրյանը չունի, բայց եթե նման բան եղել է`դատապարտելի խախտում է համարում:
Մեկ այլ հարցի` եթե Հրայր Թովմասյանը հրաժարական ներկայացներ, Արսեն Բաբայանին կձերբակալեի՞ն, Սասուն Խաչատրյանը պատասխանեց, որ Թովմասյանի հրաժարականը քրեական գործի հետ որեւէ առնչություն չունի:
Դիտարկմանը`ինչո՞ւ է մեկ պատգամավորի թույլատրվում հանդիպել ոճրագործ Նաիրի Հունանյանին, իսկ Արսեն Բաբայանին հանդիպելու պատգամավորների դիմումը մերժվում է, Սասուն Խաչատրյանը հորդորեց`նրանց նույն հարթության վրա չդնել, քանի որ կալանք կրող դատապարտյալի եւ երկու ամսով նախաքննական կալանքի տակ գտնվող անձերի կարգավիճակներն են այլ:
Այլ մանրամասները` տեսանյութում
Նելլի ԳՐԻԳՈՐՅԱՆ
