Վենետիկի հանձնաժողովի նախագահ Ջիանի Բուքիքիոյի հայտարարությունից ԱԺ ԲՀԿ խմբակցության պատգամավոր Գեւորգ Պետրոսյանը «կոշտ դրսեւորումների» տպավորություն է ստացել:
Այսօր խորհրդարանում լրագրողների հետ զրույցում անդրադառնալով ՀՀ ՍԴ նախագահի եւ դատարանի շուրջ վերջին շրջանում ընթացող իրադարձությունների վերաբերյալ Վենետիկի հանձնաժողովի նախագահ Ջիանի Բուքիքիոյի հայտարարությանը, Գեւորգ Պետրոսյանն ասաց. «Մենք այստեղ ավելի շատ պետք է փորձենք հասկանալ ենթատեքստը: Քանի որ այնտեղ իսկապես կար կոպիտ գնահատական, ինչը չի բխում Հայաստանի հեղինակության շահերից, ինչն ակներեւ է: Մենք պետք է ուշքի գանք եւ փորձենք առաջին հերթին շեշտը դնել տնտեսական հեղափոխության, սոցիալական արժեքների հեղափոխության վրա»:
Նրա խոսքով՝ այդ հայտարարությունում կոշտ գնահատականն այն է, որ փաստորեն ընդունում են, որ ՍԴ-ի շուրջ ստեղծված իրավիճակում քաղաքական տարր կա:
Գեւորգ Պետրոսյանի գնահատմամբ, Վենետիկն էլ է արդեն ընդունում, որ այստեղ քաղաքական հետապնդման տարր կա. «Իմ հարցազրույցներում, երբեք նման պնդումներով հանդես չեմ եկել, որ այստեղ քաղաքական հետապնդման տարր կա, բայց արդեն ժամանակն ու տարածությունը տանում են այդ համոզմանը: Պետք է ուշքի գանք, այդ ձերբակալություններով ու կալանավորումներով ի՞նչի ենք հասնելու: Մի քանի անգամ արդեն ասել ենք, որ դրանով մենք հիասթափություն ենք առաջացնում այն ներդրողների մոտ, որոնք Հայաստանում ցանկանում են տնտեսական ծրագրեր իրականացնել»:
Կարդացեք նաև
«Ժողովրդին շոուներով կերակրելը» ընդդիմադիր պատգամավորը համարում է «անարդունավետ եւ կարճաժամկետ քայլ, որին վերջ դնելու ժամանակն է»: Նա կարծում է, որ մարդիկ մինչեւ «կոկորդները կուշտ» են ձերբակալություններից, «պատերին ծեփելուց» ու «ասֆալտին փռելուց» եւ իրավապահներին հորդորում է`դադար առնել:
Նելլի ԳՐԻԳՈՐՅԱՆ
