ՀՀ ԱԺ առողջապահության եւ սոցիալական հարցերի մշտական հանձնաժողովը հոկտեմբերի 28-ին կազմակերպել էր աշխատանքային քննարկում «Հայաստանում չարորակ հիվանդությունների կանխարգելման, վաղ հայտնաբերման եւ բուժման արդյունավետության բարձրացման նպատակով իրականացվող ծրագրերի ընթացիկ վիճակն ու առկա խնդիրների լուծման ուղիները» թեմայով:
Մշտական հանձնաժողովի նախագահ Նարեկ Զեյնալյանը նշել է, որ ՀՀ առողջապահության նախարարության կողմից առաջնահերթության ծրագրերի մեջ ներառված է նաեւ չարորակ հիվանդությունների կանխարգելումը, վաղ հայտնաբերումն ու բուժօգնությունը եւ հրավիրված քննարկման նպատակն է անդրադարձ կատարել այն խնդիրներին, որոնք վերանայման կարիք ունեն:
ՀՀ առողջապահության նախարարի տեղակալ Անահիտ Ավանեսյանի խոսքով՝ ուռուցքաբանությունը ոլորտի ռազմավարական ուղղություններից է եւ առաջիկա 5 տարիների կտրվածքով մշակվում է համապատասխան ծրագիր: Չարորակ նորագոյացությունների բուժումը բարդ եւ բազմաբաղադրիչ գործընթաց է: Առկա իրավիճակում, առաջնահերթ կարեւորություն ունի բուժման հասանելիության ապահովումը, որն ուղղակիորեն ազդում է հիվանդի դիմելիության եւ հիվանդության վաղ ախտորոշման վրա. անձն այլեւս չի սարսափի ախտորոշել քաղցկեղը եւ դեմ առ դեմ մնալ իրեն համար անհասանելի բուժման խնդրի առաջ: Փոխնախարարը տեղեկացրել է, որ որպես երկրորդային կանխարգելման գործուն միջոցառումներ, Հայաստանում ներդրվում են նաեւ սկրինինգային ծրագրեր: 2019 թվականի փետրվար ամսից ախտորոշված չարորակ նորագոյացությունների վիրաբուժական բուժումն անվճար է բնակչության բոլոր խմբերի համար: Անահիտ Ավանեսյանը նշել է, որ ուռուցքաբանությանն ուղղված բյուջետային հատկացումներն ավելացել են եւ 2020 թվականին կկազմեն մոտ 3 միլիարդ դրամ: Նախորդ տարի բնագավառի ֆինանսավորումը կազմել է 1 միլիարդ 300 միլիոն դրամ:
Քաղցկեղի դեմ համակարգված միջոցառումներ իրականացնելու նպատակով նախարարությունում գործում է չարորակ նորագոյացությունների բուժման արդյունավետության բարձրացման եւ կառավարման համակարգող խորհուրդ:
Կարդացեք նաև
Քննարկման ընթացքում ներկայացվել է Հայաստանում չարորակ նորագոյացություններով պայմանավորված հիվանդությունների վիճակագրական վերլուծությունը: Նշվել է, որ առաջին անգամ ախտորոշված չարորակ նորագոյացությունների թիվը 2018 թվականին կազմել է 8329: Գերակշռում է թոքի եւ կրծքագեղձի քաղցկեղը:
Մասնակիցները մտքեր են փոխանակել քաղցկեղի վաղ հայտնաբերման եւ ճշգրիտ ախտորոշման գործում հյուսվածքաբանական հետազոտությունների, ճառագայթային ախտորոշման դերի վերաբերյալ: Անդրադարձ է կատարվել նաեւ չարորակ նորագոյացությունների ճառագայթային, քիմիոթերապեւտիկ եւ վիրահատական բուժման ժամանակակից մոտեցումներին, առկա խնդիրներին, զարգացման հեռանկարներին:
Ի տարբերություն վիրահատական բուժման, որն իրականացվում է պետպատվերի շրջանակում, քիմիոթերապեւտիկ բուժման համար այսօր գործում է համավճար: ՀՀ առողջապահության նախարարության կողմից իրականացվում են աշխատանքներ՝ այդ ծառայության հասանելիությունն ապահովելու ուղղությամբ:
Մասնագետները բարձրաձայնել են նաեւ պալիատիվ խնամքի հասանելիության հարցը:
Քննարկումների արդյունքում արձանագրված խնդիրներն ու ձեւավորված առաջարկությունները՝ հետագա ռազմավարական քայլերը մշակելու նպատակով, կներկայացվեն ՀՀ առողջապահության նախարարություն:
ՀՀ ԱԺ առողջապահության եւ սոցիալական հարցերի մշտական հանձնաժողովը հետեւողական կլինի անհրաժեշտ օրենսդրական փոփոխությունների իրականացմանը:
ՀՀ Ազգային ժողով
