Քիչ առաջ արտակարգ դեպք է տեղի ունեցել Շիրակի մարզի Ազատան համայնքում․ ժամը 14:13-ին «911» ծառայություն տեղեկություն է հաղորդվել, որ Շիրակի մարզի Ազատան գյուղի 1-ին փողոցի տներից մեկի վատառողջ բնակիչը (մոտ 80 տարեկան) չի արձագանքում դռան թակոցներին և հեռախոսազանգերին. անհրաժեշտ է փրկարարների օգնությունը։
Դեպքի վայր մեկնած ոստիկաններն ու փրկարարները հայտնաբերել էին տանտերերի դիերը․ մեկին՝ լոգարանում գազախողովակից կախված վիճակում, մյուսին՝ ննջարանում։ Մահացածները հայր ու որդի են՝ 80-ամյա Ալբերտ Կ․-ն և 46-ամյա Կարեն Կ․-ն։
Ազատան գյուղի բնակիչները Aravot.am-ին մանրամասնեցին, որ հայր ու որդի ապրում էին միասին, մայրը վաղուց է մահացել, երկու եղբայրներն էլ բնակվում են ՌԴ-ում։
Ըստ հարևաններին հասած տեղեկությունների, 46-ամյա որդին, տեսնելով հոր մահը, չի դիմացել, ինքնասպան է եղել։ 46-ամյա Կարեն Կ․-ն ամուսնացած չէ, չի աշխատում։
Կարդացեք նաև
Ըստ գյուղացիների, կրթված ընտանիք էր․ հայրը ժամանակին դասախոսել է Շիրակի մարզի բուհերից մեկում, նաև աշխատել է կադաստրի համակարգում։
Այս պահին տեղում աշխատում են փրկարարները, ոստիկանները, քննիչները։
Շիրակի դատախազ Կարեն Գաբրիելյանն էլ Aravot.am-ին փոխանցեց, որ նյութեր են նախապատրաստվում, նշանակված է դիակի դատաբժշկական փորձաքննություն, եզրակացությունն ունենալուց հետո կգան անհրաժեշտ հետևության։
Նունե ԱՐԵՎՇԱՏՅԱՆ
