«Հստակ կարող եմ ասել, որ գաղտնի որոշումները հրապարակման ենթակա չեն, չեմ ցանկանում իրավական տեսանկյունից ստանձնել պատասխանատվություն և բացահայտել ինֆորմացիան»,- խորհրդարանում լրագրողների հետ զրույցում ասաց Արագածոտնի մարզպետ Դավիթ Գևորգյանը: Լրագրողները մարզպետից հետաքրքրվում էին վարչապետի գաղտնի հանձնարարականի մասին, որով պետական կառավարման համակարգում աշխատավարձեր են բարձրացվել, այդ թվում նաեւ մարզպետների պարգեւավճարների տեսքով:
Ըստ Արագածոտնի մարզպետի, պետական կառավարման համակարգում ստորին օղակներից մինչև ամենաբարձրաստիճան պաշտոնյաներ, հստակ սահմանված են դրույքաչափեր, որից զատ կան նաև պարգևավճարներ: Մարզպետը պատրաստ էր խոսել միայն այն տեղեկատվության մասին, որը գաղտնիություն չի պարունակում: Դավիթ Գևորգյանը հրաժարվեց ասել, թե որքան աշխատավարձ է ստանում, քանի որ ըստ նրա՝ դա գաղտնի ինֆորմացիա է:
Հարցին՝ նորմա՞լ է համարում, երբ երկրի ղեկավարը գաղտնի հանձնարարականով է բարձրացնում նախարարների, փոխնախարարների ու մարզպետների աշխատավարձը, մարզպետը պատասխանեց. «ՀՀ վարչապետի ցանկացած որոշում ոչ միայն նորմալ, այլև ճիշտ եմ համարում: Երեք միլիոն «վարչապետներն» իրենց որոշումը կայացրել են և տվել վստահության քվե, որով էլ լիազորել են մեզ որոշումներ ընդունելու: Ես ու իմ թիմում գտնվող ցանկացած մարդ, քանի դեռ գտնվում է այդ թիմում, նույնիսկ բարոյական տեսանկյունից ճիշտ չի լինի, որ սխալ համարի վարչապետի որոշումը»:
Մարզպետը «ոչ կոռեկտ» որակեց լրագրողի հարցը` ինքն արժանի՞ է 800 հազար դրամ աշխատավարձ ստանալուն: «Եթե ես արժանի չլինեմ և իմ կատարած աշխատանքը վատը լինի, ապա այդ պաշտոնում չէի լինի: Եթե ՀՀ վարչապետը վստահել է ինձ և շարունակում է վստահել Արագածոտնի մարզը, ապա գտնում է, որ ես արժանի եմ»:
Կարդացեք նաև
Ինչ վերաբերում է մարզպետարանի շատ աշխատողների, որոնք դժգոհում են, քանի որ ցածր աշխատավարձ են ստանում, Դավիթ Գևորգյանն ասաց` ինքն էլ է դժգոհ, որ նրանք ցածր աշխատավարձ են ստանում: Իր կարծիքով, արդյունավետ պետական համակարգ ստանալու համար, պետք է պետական համակարգի ամենացածր վարձատրվող աշխատողները բարձր աշխատավարձ ստանան:
Նելլի Գրիգորյան
