ԱԺ պատգամավոր Արման Բաբաջանյանը պատասխան չունի, թե ով էր իրեն լիազորել զրուցել «Հոկտեմբերի 27»-ի գործով ցմահ ազատազրկման դատապարտված ահաբեկչական խմբավորման ղեկավար Նաիրի Հունանյանի հետ հանդիպել:
Պատգամավորը Aravot.am-ի հետ զրույցում ասաց, որ չի ցանկանում պատասխանել հոկտեմբերի 27-ի զոհերից Կարեն Դեմիրճյանի իրավահաջորդի շահերի ներկայացուցիչ, փաստաբան Աշոտ Սարգսյանի առաջ քաշած հարցադրումներին, թե հանցագործի հետ ինչ էր զրուցում ու ով էր իրեն լիազորել հանդիպել, բանակցել նրա հետ:
Հիշեցնենք, որ Աշոտ Սարգսյանը հոկտեմբերի 27-ի 20-րդ տարելիցի օրը լրագրողների հետ զրույցում ասել էր. «Պետք է լինի պաշտոնական հարցաքննություն, ոչ թե մեկի քմահաճույքով, քնից արթնանա, գնա հետը զրուցի, նման բան չի լինում. հանցագործի հետ ինչ ես զրուցում կամ ով է քեզ այդ լիազորությունները տվել, բանակցում ես մի կողմի հետ, բայց այդ բանակցային կողմ քեզ որեւէ տուժողի իրավահաջորդ լիազորե՞լ է»:
Կարդացեք նաև
Հիշեցնենք, որ նախօրեին Արման Բաբաջանյանը facebook-ի իր էջում գրել էր՝ Անահիտ Բախշյանն իրեն հայտնել է, որ հոկտեմբերի 27-ին զոհերի հարազատները ցանկանում են իր հետ հանդիպել, պատգամավորն ասել էր, որ փակ հանդիպման ձեւաչափով կհանդիպեն առաջիկա օրերին: Սակայն հոկտեմբերի 27-ի 20-րդ տարելիցի օրը Անահիտ Բախշյանը լրագրողներին ասաց, որ չի ցանկանում հանդիպել պատգամավորի հետ ու չի ցանկանում մեկնաբանել՝ ինչու: Արման Բաբաջանյանը մեզ հետ զրույցում չցանկացավ անդրադառնալ նաեւ այս հարցին:
Արփինե ՍԻՄՈՆՅԱՆ
