Քիչ առաջ մեղադրանք է առաջադրվել Ազգային ժողովի նախկին նախագահ, հայտնի բժիշկ Արա Բաբլոյանին: Այս մասին հայտնեց նրա շահերի պաշտպան Արամ Վարդեւանյանը: Ըստ փաստաբանի, Բաբլոյանին մեղադրանք է առաջադրվել երկու հոդվածով՝ իշխանության յուրացում` 300 հոդվածը եւ 314-րդ հոդվածով էլ՝ պաշտոնական կեղծիք:
«Ունենք դատավարական կարգավիճակի փոփոխություն, Արա Բաբլոյանը ուներ կասկածյալի կարգավիճակ, այսօր նրան մեղադրանք առաջադրվեց»,-ասաց Արամ Վարդեւանյանը՝ նշելով, որ որպես խափանման միջոց ընտրվել է ստորագրություն չհեռանալու մասին:
Փաստաբանը նշեց նաեւ, որ հաշվի չի առնվել Արա Բաբլոյանի գործառութային անձեռնմխելիությունը՝ որպես պատգամավոր: Նաեւ ասաց, որ քննիչների գործողություններում ակնհայտ խնդիր չի տեսնում, բայց մասնագիտական առումով անհամաձայնություն ունի. «Խափանման միջոց ընտրված է ստորագրություն չհեռանալու մասին, մեր կողմից ցուցմունքներ տրվել են»:
Հարցին՝ արդյոք քաղաքական ենթատեքստ է տեսնում, Վարդեւանյանը պատասխանեց. «Իրավական տեսանկյունից ես տեսնում եմ շատ խոցելի, անհիմն մեղադրանք, բայց ես կարող եմ ասել, որ կան քրեական գործեր, որոնք հարուցվում են, այնուհետեւ կարճվում են: Արման Բաբաջանյանն էր ներկայացրել հաղորդում, այն հիմնականում վերաբերում էր Սահմանադրության 95-րդ հոդվածին, որով պատգամավորի լիազորությունները դադարում են եւ այնտեղ կար պնդում, որ, այսպիսով` Արա Բաբլոյանի կողմից ընդունված որոշմամբ` Հրայր Թովմասյանը շարունակել է պաշտոնավորել որպես պատգամավոր, այդ մասով որեւէ մեղադրանք չի առաջադրվել եւ այդ մասով կա արդարացում»:
Կարդացեք նաև
Լուսինե ԲՈՒԴԱՂՅԱՆ
