Ինչպես ավելի վաղ հայտնել էինք, հեմոդիալիզի գնումների գործով առաջին դատական նիստն է այսօր:
Գործով մեղադրյալներից Տարոն Ավետիսյանի շահերի պաշտպան, փաստաբան Հրանտ Ավետիսյանը հայտարարեց. «Տարոն Ավետիսյանը ցանկանում է օգտվել արագացված դատաքննության հնարավորությունից, գտնում ենք, որ պետք է գործից մաս անջատել»:
Մյուս երկու մեղադրյալների՝ Սամվել Ադյանի եւ Գեւորգ Խաչատրյանի շահերի պաշտպանները չառարկեցին, ավելին՝ ասացին, որ իրենք էլ ունեն նման միջնորդություն:
Գործով մյուս մեղադրյալ, ՀՀ պետական վերահսկողական ծառայության լիազորությունները ժամանակավորապես դադարեցված պետ Դավիթ Սանասարյանի շահերի պաշտպան, փաստաբան Արսեն Սարդարյանը միջնորդության դեմ չառարկեց. «Դա բխում է նաեւ մեր շահերից, որովհետեւ գործը ողջամիտ ժամկետներում քննելու հնարավորություն կլինի»:
Կարդացեք նաև
Արսեն Սարդարյանը հավելեց. «Գործի հանգամանքներից Դավիթ Սանասարյանին վերաբերելի ապացույցները փոքրաթիվ են, ցուցմունքների տեսանկյունից երկու երեքի մասին է խոսքը: Գործի քննության ծավալը էապես կնվազի: Բացի այդ, Սանասարյանը բացառապես անմեղ է: Մյուս երեք անձանց մեղադրանքը Դավիթ Սանասարյանի մեղադրանքին անմիջականորեն չի առնչվում, էապես տարբերվում է: Ըստ մեղադրանքի՝ նա իբրեւ թե տեղյակ է եղել այդ գործողությունների մասին, թեեւ՝ մասնակի: Գտնում ենք, որ անմեղության կանխավարկածին չի վնասի մյուս երեք մեղադրյալների մեղադրանքի՝ գործից անջատելը»:
Գործով մեղադրող-դատախազ Գեւորգ Սարգսյանը միջնորդության դեմ առարկեց՝ ասելով, որ այդ չորս անձանց մեղադրանքները փոխկապակցված են. «Հանրային վտանգավորության հետեւանքների փոխկապակցվածություն եւս առկա է: Չի կարող գործից մաս անջատվել»:
Դատավոր Դավիթ Բալայանը միջնորդությունը մերժեց:
Լուիզա ՍՈՒՔԻԱՍՅԱՆ
