«Բուլղարիայի համար դա շատ կարեւոր ծրագիր է: Մենք շատ լավ հարաբերություններ ունենք ինչպես Ադրբեջանի, այնպես էլ ՀՀ-ի հետ»,-ՀՀ ԱԳՆ-ում լրագրողների հետ ճեպազրույցում այսօր անդրադառնալով փաստին, որ 2020թ.-ին Բուլղարիան նախատեսում է Ադրբեջանից գազ ստանալ, ասաց Բուլղարիայի փոխվարչապետ-արտաքին գործերի նախարար Եկատերինա Զախարիեւան:
Լրագրողները հետաքրքրվեցին, թե Ադրբեջանի՝ Բուլղարիային գազի մատակարարման գործոնն ինչպե՞ս կարող է ազդել Արցախյան հակամարտության առնչությամբ Բուլղարիայի դիրքորոշման վրա:
Եկատերինա Զախարիեւան պատասխանեց. «Կայունությունը, բարեկեցությունը եւ սառեցված հակամարտությունների լուծումը այս տարածաշրջանում կարեւոր առաջնահերթություններից են Եվրամիության համար: Կարծում եմ՝ այս սառեցված հակամարտությունների լուծման միակ տարբերակը խաղաղ երկխոսությունն է, տվյալ դեպքում՝ ԵԱՀԿ Մինսկի խմբի օգնությամբ: Հակամարտությունը պետք է լուծել խաղաղ բանակցությունների միջոցով, այլապես այն կսահմանափակի ՀՀ-ի տնտեսական զարգացումը: Մեր դիրքորոշմամբ՝ միակ լուծումը խաղաղ բանակցությունն է»:
Լուիզա ՍՈՒՔԻԱՍՅԱՆ
