«Նորություն չէին նման տոնայնությունն ու դիրքորոշումը: Մենք նման մոտեցումներ լսել ենք նաեւ այլ ձեւակերպումներով»,-լրագրողների հետ ճեպազրույցում այսօր անդրադառնալով Թուրքիայի Արտաքին գործերի նախարար Մեւլութ Չավուշօղլուի հայտարարությանը, թե «հայերն ահաբեկիչներ են եւ աջակցում են Սիրիայի քրդական ահաբեկչական խմբավորումներին», եւ որ Թուրքիան սատարում է Ադրբեջանի՝ «Լեռնային Ղարաբաղի իր տարածքները վերադարձնելու» պատրաստակամությանը, ասաց ՀՀ արտաքին գործերի նախարար Զոհրաբ Մնացականյանը:
«Սա իրենից ներկայացնում է անվտանգության խնդիր, այն լուրջ խնդիր է: Մենք վերահաստատում ենք մեր մոտեցումը, որ նման դիրքորոշումը դատապարտելի է, անընդունելի եւ արտահայտում է այն խորքային մտավախությունը, որ սա վտանգ է ՀՀ-ի համար Թուրքիայի կողմից՝ անվտանգության համատեքստում: Ժխտում եմ այդ տեսակետը եւ դատապարտում»,-եզրափակեց Զոհրաբ Մնացականյանը:
Լուիզա ՍՈՒՔԻԱՍՅԱՆ
