«Այդ հաղորդումը ժողովրդավարական երկրում ներքաղաքական բանավեճի առիթ է տվել, եւ խոսքը միայն ՀՀ-ի մասին չէ: Ուրախ եմ, որ ՀՀ-ում բազմակարծություն եւ քննադատություն կա, ինչպես նաեւ՝ աջակցություն»,-լրագրողների հետ ճեպազրույցում այսօր անդրադառնալով BBC-ի եթերում իր հարցազրույցի շուրջ քննադատություններին, ասաց ՀՀ արտաքին գործերի նախարար Զոհրաբ Մնացականյանը:
Նրա բնորոշմամբ. «Ակտիվ քննարկումները ողջունելի են եւ ցույց են տալիս այն ամենը, ինչին մենք ձգտում ենք՝ բազմակարծություն եւ ժողովրդական բանավեճ, առողջ հանրության կարողությունների ամրապնդում: Գիտակցել եմ, թե դա ինչ ոճի հարցազրույց է եղել եւ ամրագրել եմ այն դիրքորոշումները, որոնք բխել են մեր շահերից՝ նաեւ հաշվի առնելով, որ դինամիկ երկխոսություն է լինելու այդ հաղորդման ժամանակ: Շնորհակալ եմ տարբեր կարծիքների եւ կառուցողական քննադատության համար»:
Ինչ վերաբերում է քննադատությանն առ այն, որ Մնացականյանը պատշաճ չի արձագանքել հաղորդավարի՝ «Արցախում հայերն իրենց հողում չեն ապրում» արտահայտությանը, ԱԳ նախարարը նշեց. «Արցախի հարցի հիմքում Արցախի ժողովրդի ինքնորոշման իրավունքի իրականացումն է եւ Արցախի ժողովրդի անվտանգությունը: Մենք բազմիցս ենք արտահայտվել այս մասին: Սա է խնդրի էությունը: Բոլորիս համար է պարզ, որ Արցախի խնդիրը տարածքային վեճի հարց չէ, այլ անվտանգության, մարդու իրավունքների…: Բնականաբար, Արցախում ապրում են հայեր: Մենք եղել եւ մնում ենք Արցախի անվտանգության երաշխավորը»:
Լուիզա ՍՈՒՔԻԱՍՅԱՆ
