«Ես դիմում եմ իմ ընկերոջը՝ պարոն Ջհանգիրյանին, այն ժամանակ նա ասաց՝ պետք է Հոկտեմբերի 27-ի հետ կապված հայտարարություն անի, հետո պարզվեց, որ Ռոբերտ Քոչարյանի գրավոր գրությամբ, ինքը չարեց»,- այսօր Հոկտեմբերի 27-ի 20-րդ տարելիցի կապակցությամբ «Եռաբլուր» պանթեոնում լրագրողների հետ զրույցում ասաց Երկրապահ կամավորական միության նախագահ Սասուն Միքայելյանը:
Նա հիշեցրեց, որ նախկին զինդատախազ Գագիկ Ջհանգիրյանն է քննել Նաիրի Հունանյանի գործը և ավելի շատ բան պետք է իմանա.
«Գումարած դրան՝ Ջհանգիրյանը եղել է Վազգեն Սարգսյանի մտերիմ ընկերներից մեկը: Այդ ոճրագործությունը, եթե չբացահայտվեց, ոչ ոք չի կարող ասել, որ նման բան չի կրկնվի…
Ժամանակն է, որ ամեն մեկն իր բաժին մեղքը վերցնի, արտահայտվի»:
Անդրադառնալով Նաիրի Հունանյանի վաղաժամկետ ազատման դիմումին՝ պարոն Միքայելյանը նկատեց՝ «Նաիրի Հունանյանը դուրս գա ի՞նչ անի»:
Նա հերքեց երկրապահների՝ ԵԿՄ-ից դուրս գալու լուրերը. «Այսպես ձևավորված երկրապահում շատ մարդիկ պետք է դուրս գան, ոչ թե դուրս են եկել, այլ պետք է դուրս գան, քանի որ երկրապահը պետք է մաքրվի: Թե՛ ՀՀՇ-ի օրոք, թե՛ Ռոբերտ Քոչարյանի օրոք, թե՛ Սերժ Սարգսյանի օրոք, երկրապահի նկատմամբ միշտ ճնշումներ են եղել, ուզեցել են ձերբազատվել, բայց հնարավոր չէ, հիմա հարաբերական անդորր է»:
Կարդացեք նաև
Հարցին, թե ինչպես են վարչապետ Նիկոլ Փաշինյանի և իր հարաբերությունները, նա պատասխանեց, որ շատ լավ են.«Ես չեմ լարվում ընդհանրապես, որ լարվեմ կկտրվեմ, կան տարաձայնություններ, որոնք ընթացքում հարթվում են»:
Արփինե ՍԻՄՈՆՅԱՆ
