«Հանրապետություն» կուսակցության նախագահ Արամ Սարգսյանի համոզմամբ, նոր իշխանությունները որևէ կաշկանդվածություն չունեն Հոկտեմբերի 27-ի բացահայտման հարցում, բայց այս փուլում գործի վերաբացումը կրկին վստահություն չի ներշնչելու. նման գործի համար հարկավոր է ունենալ արդար դատական համակարգ:
Այսօր Հոկտեմբերի 27-ի 20-րդ տարելիցի կապակցությամբ «Եռաբլուր» զինվորական պանթեոնում նա լրագրողների հետ զրույցում ասաց.
«Միանշանակ է, որ իշխանությունները շահագրգռված են գործի բացահայտմամբ: Գործը, իսկապես, քաղաքական ենթատեքստ ունի։ Մեկ անգամ արդեն քաղաքական դատավարություն եղել է, և տարբեր մարդիկ տարբեր նպատակներով դատավարություն արագ անցկացրել են, և դրա արդյունքները չեն բավարարել որևէ մեկին: Ամենայն հավանականությամբ, նման հանցագործության գնացած ստահակը ամեն ինչի ընդունակ է և ես չեմ բացառում, որ հիմա ինքը, իմանալով, որ իր կողքի խցում է նստած Ռոբերտ Քոչարյանը, փորձի օգտվել դրանից և որոշակի բաներ ասի, ինչը կարող է և ճշմարտությունն է, գուցե ասվում է նրա համար, որ հայտնվի շահեկան իրավիճակում»:
Արամ Սարգսյանի կարծիքով՝ Հոկտեմբերի 27-ի նման բարդ դատավարությունները պետք է տեղի ունենան այնպիսի ժամանակահատվածում, երբ պետությունն իսկապես ուժեղացած կլինի.
«Երբ ուժեղ պետություն կլինենք, այդ ժամանակ կարող ենք ստուգել արտաքին քաղաքական վարկածը, չեմ կարծում այսօրվա Հայաստանի Հանրապետությունը դա կարող է ստուգել, այն պարագայում, երբ Ռուսաստանի նախագահը գալիս է Հայաստան և ուզում է հանդիպել Ռոբերտ Քոչարյանին: Ես գտնում եմ, որ այս փուլում գործի վերաբացումը, գործի վերաբացմամբ դատավարության անցկացումը նույնչափ վստահություն չի ներշնչելու, ինչ նախկինում։ Ես ուզում եմ միայն արդար դատական համակարգ ունենալու պարագայում գործը բացահայտվի»:
Արփինե ՍԻՄՈՆՅԱՆ
