Հոկտեմբերի 23-ին Ազգային ժողովում վարչապետ Նիկոլ Փաշինյանի պարզաբանումները նախարարների ու փոխնախարարների աշխատավարձի հավելումների վերաբերյալ գոհացուցիչ պատասխանների փոխարեն նոր հարցեր առաջացրեցին: «Լուսավոր Հայաստանի» առաջնորդի եւ «Բարգավաճ Հայաստանի» ներկայացուցչի հարցադրմանը ի պատասխան վարչապետը առավել խճճեց խնդիրը, եւ նրա պատասխանից պարզ չդարձավ, որ ընթացիկ տարվա մարտի 1-ից ի վեր նախարարներին ու նրանց տեղակալներին վճարվող ամսական գումարները աշխատավարձի՞, թե՞ պարգեւավճարի անվան տակ են տրվում: Միայն փաստվեց, որ այդ հավելումները ԱԺ-ի կողմից նախապես հաստատված պարգեւավճարների ֆոնդից են եղել եւ ոչ թե, ուզեցավ հասկացնել վարչապետը, ինչ-որ անհայտ աղբյուրից: Խնդիրը առավել խճճվեց սակայն, երբ վարչապետը հայտարարեց, թե «ընդունված որոշման արդյունքում որոշ նախարարների եւ պաշտոնյաների աշխատավարձերը բարձրացել են, մյուսներինը՝ կրճատվել»:
Ի՞նչ է նշանակում դա, նկատի ունեմ ոչ թե բարձրացված, այլ կրճատվա՛ծ աշխատավարձերը կամ պարգեւավճարները: Չհասկացվեց՝ պատժամիջո՞ց է կիրառվել վերջինների դեմ, եւ եթե այո՝ ինչո՞ւ: Մտքի հանգստություն չպատճառեց նաեւ վարչապետի հաջորդ պատասխանը, թե այդ հավելավճարներն արվել են, «որպեսզի նախարարները սեղմված վիճակում չհայտնվեն եւ ինքնուրույն իրենց պարգեւավճարներ չգրեն»…
Նշանակո՞ւմ է սա արդյոք, որ նախարարներից ոմանք էլ «սեղմված» չեն, հետեւաբար կարելի է նաեւ նրանց աշխատավարձերը կամ պարգեւավճարները չբարձրացնել, այլ նույնիսկ՝ կրճատել: Ինչո՞ւ, լավ չե՞ն աշխատում, ծանրաբեռնված կամ «սեղմված» չե՞ն: Այդ պարագայում նրանք չե՞ն դիմի «ինքնուրույն իրենց պարգեւավճարներ գրելու» քայլին, այն էլ՝ կոռուպցիայի դեմ պայքարի առաջնահերթություն հայտարարած մեր երկրում:
Հետեւաբար ի զուր է ներկայիս վարչապետի ջանքերը աշխատավարձի բարձրացումով, պարգեւավճարներով եւ այլ ձեւերով՝ փաստորեն կաշառելու իր պաշտոնյաներին, որպեսզի… չկաշառվեն: Այն էլ՝ եթե ոչ գաղտնի, ապա թաքուն, վկայակոչելով ինչ-որ ֆոնդ, որը հիշեցնում է նախկին իշխանությունների հատուկ մի գանձարկղը, որտեղից ծրարներով փող էր դուրս գրվում ամեն ամիս:
Կարդացեք նաև
Պետական պաշտոնյան պետք է օրինավորապես եւ ըստ արժանվույն վարձատրվի: Վարձատրություն, որին եթե համաձայն չէ, թող չստանձնի պաշտոնը: Պետական պաշտոնը նաեւ նվիրում է պահանջում, էլ չխոսելով հայրենասիրության մասին:
Հակոբ ԱՎԵՏԻՔՅԱՆ
Հոդվածն ամբողջությամբ՝ «Ազգ» թերթի այս համարում
