Պատգամավոր Արման Բաբաջանյանն օրերս այցելել էր Հոկտեմբերի 27-ի ոճրագործության համար դատապարտված Նաիրի Հունանյանին: Այսօր ԱԺ ճեպազրույցների ժամանակ Aravot.am-ը պատգամավորներից հետաքրքրվեցինք՝ դուք չե՞ք պատրաստվում հանդիպել Նաիրի Հունանյանի հետ, հարց չունե՞ք նրան տալու եւ ինչպե՞ս եք վերաբերվում Հունանյանի՝ պայմանական վաղաժամկետ ազատ արձակվելու դիմումին:
ԲՀԿ պատգամավոր Արման Աբովյանը պատասխանեց. «Որպես մարդ բազմաթիվ հարցեր ունեմ նրան տալու: Որպես քաղաքական գործիչ, իհարկե, ունեմ, սակայն զերծ կմնամ այսօր հնչեցնելուց»:
«Իմ քայլը» խմբակցության պատգամավոր, ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանը պատասխանեց. «20 տարվա մեջ սա առաջին հանդիպումն էր, որ տեղի է ունենում Նաիրի Հունանյանի հետ: Տարբեր ձեւաչափերով մինչ այդ եղել են կարճ հանդիպումներ: Հիշում եմ, որ մեկ տարի առաջ նաեւ արդարադատության նախարար Արտակ Զեյնալյանն էր ուզեցել հանդիպել, թե ինչ հարց էր քննարկել, այդպես էլ պարզ չդարձավ, բայց ես իմացա, որ մեր գործընկեր Արման Բաբաջանյանը 2 ժամ հանդիպում է ունեցել ու քննարկել տարբեր հարցեր: Հանդիպումը, կարծում եմ, կարեւոր էր այն առումով, որ 20 տարի հետո մեր երկրի քաղաքական ընթացքը կրակահերթերի միջոցով շրջած անձնավորությունն ունի հնարավորություն դիմել վաղաժամ ազատ արձակվելու, պետությունն ունի ընթացակարգ, թե այդ ցանկությունն իրավական ճանապարհով ինչպես պետք է իրացվի»:
Կարդացեք նաև
Անդրանիկ Քոչարյանն ասաց, որ հասարակությունը պատրաստ չի Նաիրի Հունանյանին տեսնել ազատության մեջ, ինչպես եւ ինքը պատրաստ չէ, քանի դեռ Նաիրի Հունանյանը չի համագործակցել նախաքննական մարմնի հետ, որը կասեցված կարգավիճակ ունի, կազմակերպիչների մասով գործը կարճված է եղել գլխավոր դատախազության կոլեգիայի միջոցով, որն այդ իրավասությունը չի ունեցել. «Այդ կոլեգիայի որոշումը իրականացվել է դատախազության այն ժամանակվա ՀՔԾ պետի տեղակալ Մարսել Մաթեւոսյանը՝ կարճելով այդ գործը և, ըստ էության, վերադարձնելով Ռոբերտ Քոչարյանի այն տեսակետին, որ կազմակերպիչներ փնտրել այլեւս պետք չի: Դա իրականացվել է այն ժամանակ գլխավոր դատախազ Աղվան Հովսեփյանի պաշտոնավարման ժամանակահատվածում»:
Անդրանիկ Քոչարյանը խոսեց այն մասին, թե ինչպես են Հոկտեմբերի 27-ի գործով վկաները առեղծվածային պայմաններում մահացել. «Շատ քիչ մարդ է մնացել, որ կարող են 27-ի լուսաբանման խնդիր լուծել: Ես տեսնում եմ երեկվանից, թե ինչպիսի անհանգստություններ կան տարբեր լրատվական կառույցների կողմից, թե Նաիրի Հունանյանը որ խոսի, սա ո՞ւմ է ձեռնտու: Սա ձեռնտու է Հայաստանի պետականությանը: Եթե խոսի: Բայց Նաիրի Հունանյանի խոսացածը դա դեռ վերջին ճշմարտությունը չի»:
Հռիփսիմե ՋԵԲԵՋՅԱՆ
