ՀՔԾ-ում հարուցված քրեական գործի շրջանակում ԱԺ նախկին նախագահ Արա Բաբլոյանի կարգավիճակը չի փոխվել: Այս մասին այսօր Հատուկ քննչական ծառայությունում Արա Բաբլոյանի հարցաքննությունից հետո լրագրողներին հայտնեց նրա շահերի ներկայացուցիչ, փաստաբան Արամ Վարդեւանյանը:
«Քննչական գործողություններ են ընթանում: Եկեք սպասենք որոշակի ժամանակահատված, ինչից հետո մասնագիտական դիրքորոշում կհայտնեմ»,-նշեց Արամ Վարդեւանյանը: Նա նախընտրեց այս փուլում փաստական հանգամանքների մասին չխոսել: Հարցին՝ «քաղաքական հետապնդման տարրեր տեսնո՞ւմ եք», նա այսպես արձագանքեց. «Գտնում եմ, որ այդ եւ այլ հարցերի հնարավոր կլինի անդրադառնալ կարճ ժամանակ անց, երբ գործի նյութերի մասին կունենանք ավելի հստակ պատկերացում»:
Արա Բաբլոյանը, ինչպես ՀՔԾ-ն է հայտարարել, կասկածյալի կարգավիճակում է: Հիշեցնենք, որ նույն քրեական գործով մեղադրյալ է նաեւ ԱԺ աշխատակազմի ղեկավարի նախկին տեղակալ Արսեն Բաբայանը: Ըստ նախաքննական մարմնի՝ Արսեն Բաբայանը կեղծ հիմքեր է ստեղծել՝ Սահմանադրական դատարանի լիազորություններին տիրանալու նպատակով ԱԺ նախագահ Արա Բաբլոյանի՝ 2018 թվականի մարտի 2-ին ստորագրած ՍԴ նախագահ Գագիկ Հարությունյանի հրաժարականի դիմում ներկայացնելու մասին հայտարարությունը հրապարակելու համար: Դա հիմք է հանդիսացել, որպեսզի Հարությունյանի լիազորությունները դադարեցվեն, որպեսզի հետագայում այդ պաշտոնում առաջադրվի Հրայր Թովմասյանը:
Լուիզա ՍՈՒՔԻԱՍՅԱՆ
