ՀՀ վարչական դատարանում այսօր դատավոր Արծրուն Միրզոյանի նախագահությամբ շարունակվեց 19 ջերմուկցիների՝ ՀՀ Շրջակա միջավայրի նախարար Էրիկ Գրիգորյանի դեմ ուղղված հայցի քննությունը:
Հիշեցնենք, որ այս հայցադիմումով ջերմուկցիները դատարանից պահանջում են պարտավորեցնել պատասխանողին՝ նախարար Էրիկ Գրիգորյանին, ուժը կորցրած ճանաչել Ամուլսարի ոսկու հանքի առնչությամբ շրջակա միջավայրի վրա ազդեցության գնահատման պետական փորձաքննական եզրակացությունը և ՀՀ բնապահպանության նախարարի 2016թ. ապրիլի 29–ի՝ դրա հաստատումը։
Քանի որ նախորդ նիստում գործը նշանակվել էր դատաքննության, այսօր ջերմուկցիների շահերի պաշտպան, փաստաբան Նազելի Վարդանյանը ներկայացրեց հայցի բովանդակությունը: Նախ նշեց, որ Շրջակա միջավայրի վրա ազդեցության գնահատման փորձագիտական կենտրոնը չի գնահատել Ամուլսարի ոսկու հանքի շահագործման պարագայում թվային դրենաժի բացասական ազդեցությունը՝ շրջակա միջավայրի եւ մարդու առողջության վրա:
https://www.facebook.com/aravot.am/videos/777295666053829/
Կարդացեք նաև
Նազելի Վարդանյանը նշեց. «Միջազգային փորձագետները փաստել են, որ «Լիդիան Արմենիա»-ի՝ Ամուլսարի շահագործման նախագիծը չունի պատշաճ բնապահպանական գնահատական, իսկ երկարատեւ թթվագոյացումը սպառնում է ջրի որակին, մինչ «Լիդիան»-ը ներկայացնում է, թե ազդեցությունն աննշան է լինելու: Թթվային դրենաժի ազդեցությունն առհասարակ չի գնահատվել: Փորձագետները նշում են նաեւ, որ ընկերությունը ոչ բավարար երկրաքիմիական փորձարկումներ է արել: Չի գնահատվել նաեւ մետաղի արտազատման բարձր մակարդակը: Միջազգային չորս փորձագետներ փաստել են, որ շրջակա միջավայրի վրա ազդեցության գնահատումը կատարվել է թերի: Այդ թերությունները գրված են մեր՝ դատարանին ներկայացված փաստաթղթերում, եւ դրանք «Լիդիան»-ը թաքցրել է փորձաքննություն իրականացնող մարմնից: Շրջակա միջավայրի նախարարության՝ Ամուլսարի շահագործման ծրագրին տրված դրական եզրակացությունը եւ դրա՝ նախարարի հաստատումը պետք է ուժը կորցրած ճանաչել: Էրիկ Գրիգորյանն ուժը կորցրած չի ճանաչել հանքի շահագործման 2016թ.-ի դրական եզրակացությունը, թեեւ «Էլարդ»-ի ուսումնասիրությամբ՝ նոր ի հայտ եկած հանգամանքներ են եղել: Դա վտանգում է մարդկանց առողջությունը եւ շրջակա միջավայրը»:
Նազելի Վարդանյանը նաեւ մատնանշեց, որ հանքի շահագործումը վտանգելու է կենսաբազմազանությունը, այդ թվում՝ Կարմիր գրքում գրանցված կենդանատեսակներին ու բուսատեսակներին, ինչպես նաեւ՝ Ջերմուկ քաղաքի զբոսաշրջային գրավչությունը:
Ըստ Նազելի Վարդանյանի՝ գիտնականները նաեւ փաստել են, որ հանքի շահագործման հետեւանքով թթվային հոսքը տասնյակ տարիներ է տեւելու, եւ կառավարության վրա հանքի շահագործման հետեւանքների վերացումը բավականին թանկ է նստելու:
Դատարանում հայցի քննությունը շարունակվում է:
Լուիզա ՍՈՒՔԻԱՍՅԱՆ
