«Համակարգային կոռուպցիայի վարչական հիմքերը վերացած չեն, բայց էապես թուլացած են»,-«Բլից ինֆո» մամուլի ակումբում լրագրողների հետ հանդիպմանը հայտարարեց «Թրանսփարենսի ինթերնեյշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը:
Ըստ նրա՝ 2018-ի իրադարձություններից հետո Հայաստանում լուրջ նախապայմաններ ստեղծվեցին առաջին հերթին դուրս գալու այն իրավիճակից, որում ՀՀ-ն էր գտնվում որպես համակարգային կոռուպցիայով երկիր. «Այդ իրավիճակը փաստորեն կա: Սա կարող եմ հստակ ասել: Այն համաթվերը, որոնք նկարագրում են կոռուպցիայի ընկալումը այդ տարիներին՝ 2003-2018-ին դրա մասին են վկայում: Իսկ այդ համաթվերը երբեք հարցականի տակ չեն դրվել նախորդ իշխանության ժամանակ»:
Վարուժան Հոկտանյանը տեղեկացրեց, որ 2019-ի համաթիվը կհրապարակվի 2020-ին, և այդ ժամանակ պարզ կդառնա՝ առաջընթաց կա՞, թե՞ ոչ. «Որոշակի քայլեր, որոնք արվեցին, ցույց են տալիս, որ կա քաղաքական կամք՝ ի տարբերություն նախորդ իշխանությունների, որոնց քաղաքական կամքը միայն իրավական ակտեր ընդունելով էր դրսևորվում, որոնք մնում էին թղթի վրա: Այս նոր իշխանության օրոք տեսնենք՝ ինչ տեղի կունենա»:
Վարուժան Հոկտանյանի կարծիքով՝ համակարգային կոռուպցիայի վարչական, ոչ տնտեսական հիմքերը եթե ոչ վերացած, ապա էապես թուլացած են: Ըստ նրա՝ խնդրահարույց է իշխանության ճյուղերից հատկապես դատական իշխանության անկախության հարցը: Նա մանրամասնեց. «Իշխանության ճյուղերի միջև զսպիչների, իրարից անկախ լինելու հանգամանքն է. առաջին հերթին դատական իշխանության անկախության հարցում ես որոշակի խնդիրներ տեսնում եմ: Դեռևս չեմ կարող ասել, թե ինչ է տեղի ունենում՝ կապված դատական համակարգի հետ և արդյունքն ինչ կլինի. Կունենա՞նք անկախ դատական համակարգ, թե՞ ոչ՝, որն այժմ կախված կլինի նոր իշխանության կողմից ղեկավարվող գործադիրի՞ց, դա այլ հարց է»:
Կարդացեք նաև
Հիշեցնելով, որ հոկտեմբերի 3-ին ընդունվեց հակակոռուպցիոն ռազմավարությունը, Վարուժան Հոկտանյանը նկատեց, «Ինչպես ասում են՝ սատանան իմպլեմենտացիայի, կիրառության մեջ է. ռազմավարությունը կա: Սա է գլխավոր խնդիրն ինձ համար»:
Տաթև ՀԱՐՈՒԹՅՈՒՆՅԱՆ
