ԱԺ-ում երեկ քննարկվել էր «Սեւանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան ու համալիր ծրագրերը հաստատելու մասին» հարցը: Նախագծի հեղինակը «Իմ քայլը» խմբակցության պատգամավոր Վարազդատ Կարապետյանն է, որն առաջարկում է հետեւյալը՝ եթե Սեւանա լճում նախորդ տարվա համեմատ ջրի մակարդակը իջնի, ապա անկախ նրանից, թե գյուղատնտեսության մեջ ի՞նչ տարի լինի, ինչքան էլ ջրի պակաս կա, Սեւանա լճից չպետք է ջուր բաց թողնել: Քանի որ խմբակցության ներսում էլ կարծիքները կիսվում էին, այսօր նախագծի քվեարկությունից առաջ խմբակցության ղեկավար Լիլիթ Մակունցը հայտարարեց, որ այս նախագծին «Իմ քայլը» խմբակցությունը քվեարկելու է ազատ:
«Լուսավոր Հայաստան» խմբակցության ղեկավար Էդմոն Մարուքյանն էլ հայտարարեց, որ մտահոգություններ ունեն ու գտնում են, որ նախագիծը զուտ խորհրդանշական բնույթ է կրելու. «Մենք հիմա ձեռնպահ կքվեարկենք, եթե մեր մտահոգությունները փարատվեն, կքվեարկենք կողմ»:
Նախագիծն ընդունվեց 73 կողմ, 8 դեմ, 37 ձեռնպահ ձայներով:
Միաձայն ընդունվեց նաեւ քիչ առաջ քննարկված «Ռազմական դրության իրավական ռեժիմի մասին» ՀՀ օրենքում լրացումներ կատարելու մասին նախագիծը, որի համաձայն պատերազմական գործողությունների, ռազմական դրության ժամանակ առողջապահության նախարարությունն է կառավարելու ինչպես իր ենթակայության տակ գտնվող բուժհիմնարկները, այնպես էլ մասնավոր հիվանդանոցները:
Կարդացեք նաև
Հռիփսիմե ՋԵԲԵՋՅԱՆ
