Հոգեկան առողջության պահպանման ազգային կենտրոնում՝ Նուբարաշենի հոգեբուժական հիվանդանոցում, շուրջ 33 հիվանդի մոտ աղիքային վարակ է ախտորոշվել/ հարցմանն ի պատասխան՝ հայտնել են առողջապահության եւ աշխատանքի տեսչական մարմնից։
«Ի պատասխան Ձեր՝ 2019 թվականի հոկտեմբերի 21-ին ՀՀ առողջապահության եւ աշխատանքի տեսչական մարմին կատարած առցանց հարցմանը, տեղեկացնում եմ, որ 2019 թվականի հոկտեմբերի 15-ին ՀՀ առողջապահության նախարարության «Հիվանդությունների վերահսկման եւ կանխարգելման ազգային կենտրոն» ՊՈԱԿ-ի «Երեւան քաղաքային կենտրոն» մասնաճյուղից ՀՀ առողջապահության եւ աշխատանքի տեսչական մարմնին ներկայացվել է տեղեկատվություն, որ հոկտեմբերի 13-ին «Հոգեկան առողջության պահպանման ազգային կենտրոն» ՓԲԸ-ից ստացվել է շտապ հաղորդում աղիքային վարակ նախնական ախտորոշմամբ թվով 33 հիվանդների վերաբերյալ։
Ներկայացված տեղեկատվության հիմքով հոկտեմբերի 17-ին առողջապահական եւ աշխատանքի տեսչական մարմնում հարուցվել է վարչական վարույթ՝ հոկտեմբերի 17-ից մինչեւ 24-ը ներառյալ ք. Երեւան, Նուբարաշենի թիվ 1/3 հասցեում գործող «Հոգեկան առողջության պահպանման ազգային կենտրոն» ՓԲԸ-ում զննում իրականացնելու եւ ՀՀ առողջապահության նախարարի 2013 թվականի ապրիլի 9-ի թիվ 14-Ն հրամանով հաստատված «Աղիքային վարակիչ հիվանդությունների համաճարակաբանական հսկողություն» N1 3.1.1-027 եւ ՀՀ առողջապահության նախարարի 2002 թվականի դեկտեմբերի 25-ի N 876 հրամանով հաստատված «Խմելու ջուր։ Ջրամատակարարման կենտրոնացված համակարգերի ջրի որակին ներկայացվող հիգիենիկ պահանջներ։ Որակի հսկողություն» N2-III- Ա2-1 սանիտարահամաճարակաբանական կանոններով եւ նորմերով սահմանված պահանջների պահպանումը պարզելու նպատակով։ Հայտնում ենք նաեւ, որ վերոհիշյալ՝ 2019 թվականի հոկտեմբերի 17-ին հարուցված վարույթը դեռեւս ընթացքի մեջ է, հետագա ընթացքի եւ արդյունքների մասին Ձեզ կտեղեկացվի լրացուցիչ»,– «Հրապարակի» գրավոր հարցմանն ի պատասխան՝ հայտնեց առողջապահության եւ աշխատանքի տեսչական մարմնի ղեկավար Հակոբ Ավագյանը։
Կորյուն ՍԻՄՈՆՅԱՆ
Կարդացեք նաև
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
