Հատուկ հաստատությունների ճակատագրի շուրջ վերջին օրերին բուռն քննարկումներ են: Խոսքը գիշերօթիկները փակելու կառավարության որոշման մասին է, որի հետ կապված այսօր «Իմ քայլը» խմբակցության պատգամավոր Սարգիս Խանդանյանը հարց ուղղեց աշխատանքի եւ սոցիալական հարցերի նախարար Զարուհի Բաթոյանին: Նա պատասխանեց, որ Գյումրիի տուն ինտերնատի դեպքում ծառայությունը պատվիրակելու են բարեգործական կազմակերպության, որը նույն տեղում նույն շահառուների համար կկազմակերպի ծառայությունը եւ կներգրավի ներդրումներ:
Ինչ վերաբերում է գիշերօթիկ հաստատություններին, Բաթոյանն ասաց, որ կուզեր խոսեր ոչ թե գիշերօթիկների լուծարման, այլ երեխաների՝ ընտանիքների հետ վերամիավորման մասին. «Ես զարմանում եմ, որ այս ծրագիրը քիչ աջակցություն է ստանում ու խեղաթյուրվում է հայտնի մարդկանց կողմից, որոշումներ կայացնողների կողմից: Մենք խոսում ենք երեխաների ընտանիքների կենցաղային պայմանները բարելավելու, նոր միայն նրանց ընտանիք վերադարձնելու մասին: Լավագույն նույնիսկ մանկատունը կամ գիշերօթիկը չի կարող փոխարինել թեկուզ մի փոքր դժվարության մեջ ապրող ընտանիքին: Մենք պիտի բարելավենք պայմանները»:
Նախարարն ասաց, որ գիշերօթիկ հաստատություններում ապրող երեխաների 90 տոկոսն ունեն կենսաբանական ընտանիքներ եւ նրանք հայտնվել են այդ հաստատությունում միայն սոցիալական խնդիրների պատճառով:
Հռիփսիմե ՋԵԲԵՋՅԱՆ
