Քիչ առաջ Երևանի ընդհանուր իրավասության դատարանը (նախագահող դատավոր Վաչե Մարգարյան) մասնակի բավարարեց ՀՀ երրորդ նախագահ Սերժ Սարգսյանի եղբայր Ալեքսանդր Սարգսյանի բողոքը՝ իր գույքի վրա կալանք դնելու՝ Ազգային անվտանգության ծառայության (ԱԱԾ) որոշման հետ կապված:
Aravot.am-ը Ալեքսանդր Սարգսյանի պաշտպան Միհրան Պողոսյանից հետաքրքրվեց՝ Ալեքսանդր Սարգսյանի գույքի վրայից ի՞նչ ծավալով է հանվում կալանքը, նա պատասխանեց. «Դա չենք կարող ասել: Դատական ակտը պետք է տեսնենք: Ես քննիչի որոշումն էի բողոքարկել, որն անօրինական է: Ես խնդրել էի արձանագրել իրավունքների խախտումը»:
Հարցին դատարանի այս որոշումն իրենց բավարարո՞ւմ է, Միհրան Պողոսյանը պատասխանեց. «Մինչև ընդհանուր որոշումը չստանանք, չենք կարող ասել: Պետք է տեսնեմ, նայեմ՝ ինչ է գրված որոշման մեջ, հետո պատասխանեմ՝ դա մեզ բավարարո՞ւմ է, թե՞ ոչ:
Նշենք, որ Ալեքսանդր Սարգսյանին մեղադրանք է առաջադրվել Ազգային անվտանգության ծառայության քննչական դեպարտամենտում քննվող քրեական գործի շրջանակներում, որի նախաքննությունը դեռևս շարունակվում է: Նա մեղադրվում է առանձնապես խոշոր չափով խարդախություն կատարելու մեջ: Քրեական գործի շրջանակներում կալանք է դրվել Սարգսյանի ամբողջ գույքի վրա, այլ ոչ թե մեղադրանքի ծավալի չափով:
Կարդացեք նաև
Հիշեցնենք, որ Ալեքսանդր Սարգսյանի առանձնատանը 2018 թվականի հուլիսի 5-ին խուզարկություն է կատարվել, և առգրավվել են մի շարք արժեքավոր իրեր, այդ թվում՝ Մարտիրոս Սարյանի՝ մեծ արժեք ներկայացնող գծանկարները:
Տաթև ՀԱՐՈՒԹՅՈՒՆՅԱՆ
