Հիվանդանոցում բուժօգնություն ստանալուց հետո կալանավայր տեղափոխված Ֆինանսների նախկին նախարար Գագիկ Խաչատրյանն այսօր առողջական պատճառներով չի ներկայացել դատարան: Այս մասին լրագրողների հետ զրույցում դատական նիստից հետո ասաց Խաչատրյանի պաշտպան Երեմ Սարգսյանը:
Երեւան քաղաքի ընդհանուր իրավասության դատարանի Շենգավիթի նստավայրում այսօր քննվեց Գագիկ Խաչատրյանի կալանքի ժամկետը երկարացնելու ԱԱԾ-ի միջնորդությունը։
Երեմ Սարգսյանն ասաց, որ կողմերը ներկայացրել են իրենց դիրքորոշումները, որոշումը կհրապարակվի հոկտեմբերի 24-ին՝ ժամը 12-ին: Պաշտպանի խոսքով, մեղադրող կողմի հիմնավորումն, ըստ էության, այն է, թե ազատության մեջ գտնվելով, Գագիկ Խաչատրյանը կթաքնվի վարույթն իրականացնող մարմնից, կխոչընդոտի գործի քննությանը։
«Մեր հակափաստարկները շատ օբյեկտիվ եւ տրամաբանական են։ Բազմիցս ասել, եւ հիմա էլ կրկնում եմ. Գագիկ Խաչատրյանը գտնվել է Գերմանիայում՝ հետվիրահատական պարտադիր բուժման մեջ։ Քննիչի ընդամենը մեկ զանգով նա դադարեցրել է բուժումը, վերադարձել, ներկայացել քննիչին, հույս ունենալով, որ թույլ կտան մեկ շաբաթով դարձյալ գնալ, բուժումը ստանալ եւ վերադառնալ»,-ասաց պաշտպանը՝ նշելով, որ եղել է կոնսիլիում, դրա եզրակացությունը ներկայացրել են դատավորին, այն ուղարկել են նաեւ
Կարդացեք նաև
Գերմանիայի համապատասխան բժշկական կենտրոն, որտեղ մեկ այլ կոնսիլիում է հրավիրվել աշխարհահռչակ պրոֆեսորների մասնակցությամբ, նրանց կողմից այս եզրակացության հիման վրա տրվել է մեկնաբանություն, որ իրենք դեռ ապրիլից զգուշացնում էին, որ եթե չգա բուժման, կրկնակի վիրահատության կարիք կառաջանա:
Պաշտպանը պնդում է, որ տեղի ունեցողն ապօրինի է. «Հիմա արդեն ստացել են պատասխանը, բայց ասում են, թե պետք է փորձաքննություն իրականացնեն։ Քանի որ կոնսիլիումից իրենց ձեռնտու պատասխան չի ստացվել, որոշել են փորձաքննություն նշանակել։ Ակնհայտորեն խախտվում են անձի իրավունքները»:
Լուսինե ԲՈՒԴԱՂՅԱՆ
