Գյումրու լոկոմոտիվայի դեպոյի գործադուլի դուրս եկած մեքենավարները, որոնք երեկվանից Երևանի ու Սանահինի իրենց գործընկերների հետ բողոքի էին դուրս եկել՝ պահանջելով աշխատավարձերի բարձրացում 30 տոկոսով, այսօր խուսափեցին շփվել լրագրողների հետ։ Նշենք, սակայն, որ հենց նրանք էին հրավիրել լրատվամիջոցներին։ Բանն այն է, որ առավոտից այնտեղ ժողով է։
Խոսակցություններ կան, որ ներսում ԱԱԾ-ն է։ Ժողովից հետո երկաթուղայինները ուղղակիորեն փախնում են լրատվամիջոցներից: Հարցին, թե ՝ո՞վ կար ներսում, ի՞նչ ընթացք ունեցավ քննարկումը, մեքենավարներից ոմանք ասում են․ «Մենք փոստի աշխատակիցներ ենք», թեև լրագրողները նրանց նախկին բողոքի ցույցերից լավ ճանաչում են, գիտեն, որ մեքենավարներ են։
«Լավ երկրում կապրինք, ի՞նչ է եղել որ»,-արձագանքեց նրանցից մեկը։
Այս պահին ներսում է ԱԺ պատգամավոր Սոֆյա Հովսեփյանը։
Կարդացեք նաև
Հիշեցնենք, որ Հարավկովկասյան երկաթուղու աշխատանքներն այսօր կաթվածահար են․ Երևան-Գյումրիի-Սանահինի աշխատակիցների հայտարարած գործադուլի պատճառով Երևան-Գյումրի, Գյումրի-Երևան ուղղություններով բեռնափոխադրումներ ու ուղևորափոխադրումներ չեն իրականացվել։ Երևան-Թբիլիսի մարդատար գնացքը ևս չի շահագործվել։
ՀԿԵ աշխատակիցները ոտքի էին կանգնել նաև 11 ամիս առաջ՝ դժգոհելով, որ աշխատավարձերը կրճատել են՝ ներդնելով պարգևավճարի համակարգը, որը կամ չեն վճարում կամ վճարում են՝ ըստ հայեցողության։
Նունե ԱՐԵՎՇԱՏՅԱՆ
