«Ես միանշանակ դեմ եմ լինելու դրան»,-Aravot.am-ի հետ զրույցում ասաց 1999 թվականի, հոկտեմբերի 27-ին, Հայաստանի խորհրդարանում տեղի ունեցած ահաբեկչության զոհ դարձած խորհրդարանի փոխխոսնակ Յուրի Բախշյանի կինը` Անահիտ Բախշյանը:
Քիչ առաջ հայտնի դարձավ, որ ահաբեկչական խմբի ղեկավար, ցմահ ազատազրկված Նաիրի Հունանյանը դիմել է վաղաժամկետ ազատման համար: Դիմումը ընթացքի մեջ է: Նաիրի Հունանյանը պատիժը կրում է «Երեւան» ՔԿՀ-ում:
Օրենքը ցմահ դատապարտյալին հնարավորություն տալիս է`20 տարի պատժի կրումից հետո, նման դիմում ներկայացնել: «Ես օրենքը հարգող մարդ եմ եւ քանի դեռ ՀՀ-ում օրենքը բոլորի համար նույն ձեւով չի գործում եւ օրենքի առաջ բոլորը հավասար չեն, ուրեմն այդ օրենքից Նաիրի Հունանյանի օգտվելը համարում եմ անբարոյականություն»,- ասաց տիկին Բախշյանը` հավելելով`երբ ՀՀ-ն կլինի օրենքի, արդարադատության երկիր, «միգուցե մտածեմ`թող մի տականք էլ ավել էս արեւի տակ ման գա»:
Կարդացեք նաև
Տիկին Բախշյանը տարակուսած է. «Անբարոյականության ի՞նչ աստիճան պետք է ունենա արդարադատության համակարգը, որը այդ դիմումն ուշադրության կարժանացնի»:
Նելլի ԳՐԻԳՈՐՅԱՆ
