Մարտի 1-ի գործով մեղադրյալ, ՀՀ երկրորդ նախագահ Ռոբերտ Քոչարյանի աջակիցներից Սարգիս Օհանջանյանի կալանքի դեմ նրա պաշտպանի վերաքննիչ բողոքի քննությունը ՀՀ վերաքննիչ քրեական դատարանը կշարունակի հոկտեմբերի 23-ին՝ ժամը 14:00-ին:
Այս մասին այսօր՝ բողոքի քննության մեկնարկի օրը, լրագրողներին հայտնեց Սարգիս Օհանջանյանի շահերի պաշտպան, փաստաբան Վահե Եփրիկյանը:
Հիշեցնենք՝ Նարեկ Մութաֆյանը, ինչպես նաեւ Սարգիս Օհանջանյանը վերջերս տեսախցիկով մոտեցել էին Քոչարյանի ու մյուսների գործը քննող դատավոր Աննա Դանիբեկյանին եւ նկարահանելով` հարցեր հղել։ Հարուցվել էր քրեական գործ` դատարանի նկատմամբ անհարգալից վերաբերմունք ցուցաբերելու հատկանիշներով։ Նարեկ Մութաֆյանի վերաքննիչ բողոքի քննությունը եւս կշարունակվի նշյալ օրը:
Պաշտպան Վահե Եփրիկյանը կարծում է, որ վերաքննիչի որոշումը կհրապարակվի հենց այդ օրը. «Այս պահին կանխատեսումներ չեմ ուզում անել: Դատավոր Արտուշ Գաբրիելյանի՝ երիտասարդներին կալանավորելու միջնորդությունը բավարարելու դատական ակտն ա՜յն աստիճանի խայտառակ էր, իսկ քննիչի միջնորդությունը՝ դատարկ, որ դատարանի տրամադրվածության հարցն այս պարագայում երկրորդական է: Կալանքը պետք է վերացվի, որպեսզի Նարեկ Մութաֆյանն ու Սարգիս Օհանջանյանը ժամ առաջ ազատ արձակվեն: Պնդում եմ կարծիքս՝ նրանք ենթարկվում են քաղաքական հետապնդման»:
Կարդացեք նաև
Հավելենք, որ Վերաքննիչ քրեական դատարանի առաջ այսօր նստացույց էին անում Քոչարյանի աջակիցները՝ ի պաշտպանություն Մութաֆյանի եւ Օհանջանյանի:
Լուիզա ՍՈՒՔԻԱՍՅԱՆ
