Այսօր փոխվարչապետ Տիգրան Ավինյանը լրագրողների հետ զրույցում ասաց, որ նախքան Կադաստրի կոմիտեի արդեն նախկին ղեկավար Սարհատ Պետրոսյանի հրաժարականը՝ խոսել է նրա հետ:
«Նա ներկայացրել է իր տեսակետները, իր ունեցած խնդիրները նախկին Քաղաքաշինության կոմիտեի ղեկավարի հետ, որը հանդիսանում է իմ խորհրդականը, նաեւ ներկա Քաղաքաշինության կոմիտեի ղեկավարի հետ։ Ընդհանուր առմամբ, ինձ համար տրամաբանությունն ընդունելի չէ, որովհետեւ դա նույնն է, որ առողջապահության նախարարը հրաժարական տա, որովհետեւ համաձայն չէ Աշխատանքի եւ սոցիալական հարցերի նախարարի քաղաքականության հետ»,-ասաց Ավինյանը՝ նշելով, որ «կոռումպացվածության հասնող թայֆայականության» մասին պարոն Պետրոսյանի հայտարարությունը, իր համար էլ էր նորություն:
Հարցին, որ հրաժարականի հայտարարության տեքստում Տիգրան Ավինյանի անունն է արծարծվել, պարոն Ավինյանը պատասխանեց. «Իմ անունը շրջանառվում է այն կոնտեքստում, որ նախկին Քաղաքաշինության կոմիտեի ղեկավարն իմ խորհրդականն է, իսկ պարոն Պետրոսյանի դիտարկումը, թե հետընթաց կա այդ ոլորտում, կարծում եմ, որ նա, չլինելով Քաղաքաշինության կոմիտեի ղեկավար, դժվար ծանոթ լինի քաղաքաշինության ոլորտում առկա խնդիրներին։ Դժվար թե հարակից ոլորտ ղեկավարելով կարող ես բոլոր խնդիրներին ծանոթ լինել, այդպես չէ»։
Փոխվարչապետը ասաց, որ Սարհատ Պետրոսյանի աշխատանքը բավականին դրական էր գնահատում։
Տիգրան Ավինյանի կարծիքով, Սարհատ Պետրոսյանը հիասթափված էր, որ այդ պաշտոնը հնարավորություն չէր տալիս քաղաքաշինության ոլորտում որոշակի գործունեության ծավալել:
Կարդացեք նաև
Լուսինե ԲՈՒԴԱՂՅԱՆ
