«Իմ քայլը» խմբակցության պատգամավոր, ԱԺ պետաիրավական հարցերի հանձնաժողովի փոխնախագահ Աննա Կարապետյանի՝սեպտեմբերի 7-28-ը ԱՄՆ կատարած գործուղումը քննարկումների տեղիք է տվել: Թեեւ հետո պարզաբանում եղավ, որ այդ գործուղումը պետբյուջեի հաշվին չի եղել, այլ՝ ԱՄՆ կառավարության, այնուամենայնիվ, այսօր Aravot.am-ի հետ զրույցում Աննա Կարապետյանն իր զարմանքը հայտնեց, թե ինչպես է նենգափոխվել իրականությունը՝ ցույց տալու, թե 3000$ օրապահիկ է ստացել գործուղման ընթացքում:
Աննա Կարապետյանի խոսքով՝ «Նախ, միայն Վաշինգտոն չի եղել այցը, եղել է մի քանի նահանգներում, սկզբում՝ Վաշինգտոն, Չիկագո, Յուտա նահանգ, այնուհետեւ Կարոլինա, վերջում Բոստոն»: Նա վստահեցրեց, որ օրակարգն այնքան հագեցած է եղել, որ շոփփինգի, զվարճանքների ժամանակ առհասարակ չի մնացել. «Բազմաթիվ հանդիպումներ ենք ունեցել աշխատանքի նախարարությունում, եւ բոլոր նահանգների սենատորների, ներկայացուցիչների հետ: Նաեւ Հարվարդ ենք գնացել»:
Նա ասաց, որ նոր հրավեր է ստացել ԱՄՆ մեկնելու, բայց մերժել է այն՝ չնայած, որ նորից ամբողջ ծախսը հոգալու էր հրավիրող կողմը:
Հարցին՝ ձեր իշխանությունների օրոք խորհրդարանականների գործուղումների ծախսերը կտրուկ աճել են, մոտ 50% -ով ավելի շատ են ծախսել, քան 2017-ին նույն ժամանակահատվածում, դուք ինչո՞վ եք սա պայմանավորում ու ի՞նչ բացատրություն կտաք սրան՝ Աննա Կարապետյանը պատասխանեց. «Խորհրդարանական պետություն ենք մենք այլեւս, խորհրդարանի դերը պետք է բարձրացվի, նորմալ եմ համարում խորհրդարանների միջեւ համագործակցության առումով նաեւ: Օրինակ, Չեխիայի սահմանադրական իրավունքի հանձնաժողովի նախագահը, երբ այցելել էր Հայաստան, ԱԺ, մենք հանդիպում ենք ունեցել, ֆորմատը դրվել է նաեւ հանձնաժողովային համագործակցության եւ այս համատեքստում մենք հրավեր ենք ստացել Չեխիայից եւ պատրաստվում ենք այդ այցին՝ հանձնաժողովների մակարդակում նաեւ սկսելու համագործակցությունը: Կարծում եմ, որ խորհրդարանական երկրի պարագայում նորմալ է սա: Իհարկե, պետք է առաջնայինը տարբերել երկրորդականից, դա արվում է»:
Կարդացեք նաև
Նա վստահեցրեց, որ ինչ հրավեր լինում է, այսպես ասած չեն «վազում». «Մենք ինքներս էլ, մեր զբաղվածությունից ելնելով, մեր գործը հասցնելու տեսանկյունից ելնելով՝ չենք կարող ամեն ինչի գնալ եւ այստեղ թողնել: Գիտեք, գործուղումների ընթացքում ավելի շատ ես հոգնում եւ ավելի քամված հետ ես գալիս»:
Հիշեցնենք, որ ՀՀԿ-ի ժամանակ Հերմինե Նաղդալյանը մի քանի օրում 2 մլն-ի հեռախոսով խոսել էր Չինաստանում գտնվող որդու հետ: Աննա Կարապետյանից ճշտեցինք՝ իր գործուղման ժամանակ հեռախոսային վճարները բյուջեի՞հաշվին են եղել, թե՞ սեփական գրպանի: Նա վստահեցրեց, որ այդ ծախսերն ամբողջությամբ իր վրա են՝ ոչ հրավիրող կողմի, ոչ էլ ՀՀ ԱԺ-ի:
Հռիփսիմե ՋԵԲԵՋՅԱՆ
