Մարտի 1-ի գործով մեղադրյալ, ՀՀ երկրորդ նախագահ Ռոբերտ Քոչարյանի աջակիցներից Նարեկ Մութաֆյանի կալանքի դեմ նրա պաշտպանի վերաքննիչ բողոքի քննությունը ՀՀ վերաքննիչ քրեական դատարանը կշարունակի հոկտեմբերի 23-ին՝ ժամը 14:00-ին: Այս մասին այսօր՝ բողոքի քննության մեկնարկի օրը, լրագրողներին հայտնեց Նարեկ Մութաֆյանի շահերի պաշտպան, փաստաբան Արամ Վարդեւանյանը: «Դեռեւս որոշակի քննություն կատարելու անհրաժեշտություն տեսավ դատարանը, բացի այդ՝ աշխատանքային ծանրաբեռնվածություն կա: Մենք ներկայացրինք մեր դիրքորոշումը»,-հետաձգման պատճառն այսպես բացատրեց Արամ Վարդեւանյանը:
Հիշեցնենք՝ Նարեկ Մութաֆյանը, ինչպես նաեւ Սարգիս Օհանջանյանը վերջերս տեսախցիկով մոտեցել էին Քոչարյանի ու մյուսների գործը քննող դատավոր Աննա Դանիբեկյանին եւ նկարահանելով` հարցեր հղել։ Հարուցվել էր քրեական գործ` դատարանի նկատմամբ անհարգալից վերաբերմունք ցուցաբերելու հատկանիշներով։ Առաջին ատյանի դատարանը բավարարել էր քննիչի` Մութաֆյանին ու Օհանջանյանին կալանավորելու քննիչի միջնորդությունը։
Օհանջանյանի կալանավորման դեմ վերաքննիչ բողոքի քննությունը եւս սկսվելու է այսօր:
Լրագրողները հետաքրքրվեցին՝ «Նարեկ Մութաֆյանի եւ Սարգիս Օհանջանյանի հանդեպ քաղաքակա՞ն հետապնդում է իրականացվում»: Արամ Վարդեւանյանը պատասխանեց. «Հիմնական շեշտը պետք է դնել երկակի մոտեցումների վրա: Այս պարագայում ընտրվեց արարքի որակման ամենախիստ տարբերակը: Հիշեք «Հայելի» ակումբի դեպքը, երբ ընտրվեց հնարավոր ամենամեղմ որակումը: Իհարկե, ամեն քննիչ ազատ է արարքի որակում կատարելիս, բայց դա ցույց է տալիս նաեւ քրեական արդարադատության հանդեպ մոտեցումը: Ինչո՞ւ են ամենածանր եւ խիստ մոտեցումն ընտրել: Այստեղ է խնդիրը:
Կարդացեք նաև
Վարդեւանյանը հավելեց. «Իր համար զարմանալի է, որ Սարգիս Օհանջանյանին մեղադրանք են առաջադրել տեսանկարահանելու համար. «Փաստորեն, տեսանկարահանող սարք պահելով՝ կարող ես արդարադատության իրականացմանը խոչընդոտել կամ միջամտել: Ես անգամ տեսականորեն դա հնարավոր չեմ համարում»:
Լուիզա ՍՈՒՔԻԱՍՅԱՆ
