Լիբանանում տասնյակ հազարավոր մարդիկ դուրս են եկել փողոց՝ պահանջելով կառավարության հրաժարականը: «Լիբանանյան ուժեր» քրիստոնեական կուսակցությունը զանգվածային ցույցերի ֆոնին հայտարարել է իշխող կոալիցիայից դուրս գալու մասին: «Համոզված ենք, որ կառավարությունն ի վիճակի չէ անհրաժեշտ քայլեր ձեռնարկել, որպեսզի իրավիճակը վերահսկի, ուստի մեր նախարարներին կոչ ենք անում հրաժարական ներկայացնել»,-ասել է կուսակցության առաջնորդ Սամիր Ջաաջան:
Ցուցարարները մեծ ցնծությամբ են ընդունել այս լուրը: Տրիպոլիում՝ երկրի մեծությամբ երկրորդ քաղաքում, ակցիայի մասնակիցները մյուս կուսակցություններին ևս կոալիցիայից դուրս գալու և արտահերթ ընտրություններ անցկացնելու կոչ են արել:
Ցուցարարները բողոքում են կոռուպցիայի, բարձր հարկերի դեմ և հեղափոխության կոչեր են հնչեցնում: Ոստիկանությունը ձերբակալել է տասնյակ մարդկանց: Լիբանանի վարչապետ Սաադ Հարիրին պահանջել է կառավարությունից համաձայնեցնել բարեփոխումների ծրագիր:
Լիբանանում ցույցերը սկսվել են հոկտեմբերի 17-ին այն բանից հետո, երբ կառավարությունը որոշել է հարկ սահմանել WhatsApp-ով և այլ հաղորդակներով զանգերի համար: Իշխանությունները չեղարկել են որոշումը, սակայն ցույցերը շարունակվում են:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
