«Առողջ ապրելակերպը բոլորի համար» խորագիրը կրող միջոցառումը, որն անցկացվեց նախկին «Միկա» մարզադահլիճում, նախաձեռնել էր «Ժպիտների քաղաք» հիմնադրամը՝ «Վլադ ֆիթնես» մարզասրահի հետ համագործակցությամբ:
Նպատակները երկուսն են՝ առողջ ապրելակերպի քարոզչությունը, իսկ առողջ ապրելակերպը հիվանդությունների կանխարգելման հիմքն է, եւ հասարակության շրջանում քաղցկեղի մասին իրազեկվածության բարձրացումը:
Այսօրվա մարզմանը մասնակցում էին «Ժպիտների քաղաք» հիմնադրամի շահառու քաղցկեղով հիվանդ երեխաները, որոնք արդեն բուժվել կամ հաղթահարել են հիվանդությունը եւ տան պայմաններում են բուժում ստանում ու նրանց արդեն թույլատրվում է մարզվել: Նրանց էին միացել հիմնադրամի հոգաբարձուների խորհրդի նախագահ, ՀՀ վարչապետի տիկին Աննա Հակոբյանը՝ երկու դստրերի հետ, հիմնադրամի ընկերները, ԱԺ պատգամավորներ եւ պարզապես մարդիկ, որոնք տեղեկացել էին միջոցառման մասին եւ եկել մարզվելու:
Կարդացեք նաև
Միջոցառումը նաեւ քաղցկեղով հիվանդ երեխաների ինտեգրման առաքելություն ունի, եւ նախաձեռնողները մեծ հույսեր ունեն, որ մարզումներից հետո շատերը կընկերանան ու դրան կնպաստի առողջ ապրելակերպը:
Աշոտ ՀԱԿՈԲՅԱՆ
