«Արարատ Չելենջ» շարժումը, որը կազմակերպել է «Ավրորա» մարդասիրական նախաձեռնությունը, օր-օրի ավելի մեծ ընդգրկումներ է արձանագրում եւ գրավում է աշխարհը: Նպատակը ամբողջ աշխարհում կարիքի մեջ գտնվողներին օգնելն է:
Այն ստեղծվել է Հայոց Ցեղասպանությունը վերապրողների անունից՝ որպես երախտագիտություն նրանց փրկողների եւ ձգտում է հնարավորություն տալ մերօրյա հերոսներին՝ կյանք ու հույս պարգեւել նրանց, որոնք մարդասիրական աջակցության խիստ կարիք ունեն ամբողջ աշխարհում:
«Ավրորա» մարդասիրական նախաձեռնության համահիմնադիր, գործարար Ռուբեն Վարդանյանն Aravot.am-ի հետ զրույցում ասաց. «Ուզում եմ հիշեցնել, որ 100 հազարից ավելի հայ որբ երեխաներ կյանք են ստացել ու մեծացել են, ստացել իրենց շանսը, որովհետեւ 100 տարի առաջ մարդիկ նրանց օգնել են: Եվ այսօր շուրջ մեկ միլիոն հայ ապրում է միայն այն բանի շնորհիվ, որ ինչ-որ մեկը մեզ օգնել է: Այս նախաձեռնության խորհուրդը բարի եւ ուժեղ լինելն է: Բարի մարդը ուժեղ է, ուժ է: Մեզ համար կարեւորն այն է, որ մենք դուրս ենք գալիս զոհի գաղափարից եւ չնայած ունենք շատ խնդիրներ, որ չենք կարողանում լուծել միանգամից, բայց այդ ուժը մենք մեր մեջ զգում ենք: Հարյուր տարի ապրելով՝ մենք թուրքերին ասում ենք, որ միեւնույն է, ոչինչ չի ստացվի, նայեք՝ մենք ոչ թե մեր գոյությունն ենք պահպանում, այլ հաջողված ենք: Սա պիտի լինի մեր պատասխանը թուրքին»:
Աշոտ ՀԱԿՈԲՅԱՆ
