Հասմիկ Սարգսյանին, որը նախկինում դատարանի վճռով 3 անգամ մեղավոր է ճանաչվել գողության համար, կրկին, 4-րդ անգամ գողության համար մեղադրանք է առաջադրվել: Երեք անչափահաս երեխաների մայրը՝ Հասմիկ Սարգսյանն այսօր դատական նիստին չէր ներկայացել՝ փոքր-ինչ վատառողջ լինելու պատճառով:
Ըստ մեղադրական եզրակացության, Հասմիկ Սարգսյանին մեղադրանք է առաջադրվել այն բանի համար, որ 2018թ. հունիսի 28-ին ժամը 13:00-ից մինչեւ 18:00-ն ընկած ժամանակահատվածում մուտք է գործել Կենտրոնական կլինիկական զինվորական հոսպիտալ, կոտրել ընդունարան բաժանմունքի 5-րդ աշխատասենյակում առկա պահեստարան հանդիսացող պահարանի դուռը եւ ուրիշի գույքի գաղտնի հափշտակություն կատարելու դիտավորությամբ, այնտեղից գաղտնի հափշտակել է ավագ բուժքույր Սիրանուշ Գասեսյանին պատկանող 7.500 ՀՀ դրամ արժողությամբ դրամապանակը, որի մեջ եղել է վերջինիս բանկային քարտերը իրենց ծածկագրերով եւ 500 դրամ գումար`Գասեսյանին պատճառելով զգալի չափերի գույքային վնաս:
Այսօրվա դատական նիստում պետք է հարցաքննվեին գործով վկաները: Aravot.am-ի հետ զրույցում Հասմիկ Սարգսյանի պաշտպան Լուսինե Ասլանյանն ասաց, որ վկաները մի քանիսն են, որոնցից երկուսի դեպքում, պաշտպանը գտնում է՝ գործին առնչություն չունեն:
«Գլխավոր վկան այն տղամարդն է, որին Հասմիկը ենթադրաբար տվել է բանկային այն քարտը, որպեսզի գումարը հանի բանկոմատից: Երկու վկաները գործին առնչություն չունեն: Նրանք Հասմիկի նախկին հարեւաններն են, պարզապես բանկոմատի տեսագրությունն են նայել են, ասել են, որ տեսագրության մեջի անձին նմանեցրել են Հասմիկին: Հիմա նրանց գործով վկա են կանչում: Չեմ հասկանում, թե ինչ վկայություն պետք է տան: Ինչ է, ով տեսագրությունը նայի ու ասի՝ Հասմիկին նման է, պետք է կանչեն վկայություն տալո՞ւ: Խոսքն այն տեսագրության մասին, որտեղ ինչ-որ կին մոտենում է մի տղամարդու, տալիս է բանկային քարտը, հետո նկարներով նմանեցրել են Հասմիկին: Տղամարդը հայտարարել է՝ Հասմիկը չէ, նա ավելի նիհար ու բարձրահասակ էր»:
Կարդացեք նաև
Պաշտպանն ասաց, որ փորձաքննության եզրակացություն է տվել, որ չի կարող նույնականացնել այդ կի՞նն է, թե՞ ոչ.«Իսկ գլխավոր վկան էլ ասում է՝ այս կինն ինձ չի մոտեցել»:
Նախորդ նիստին հետազոտել էին գործում առկա հեռախոսային վերծանումների զննության արձանագրությունը, ըստ որի, Հասմիկ Սարգսյանի հեռախոսահամարին հունիսի 28-ին մուտքային զանգ է կատարվել, այն սպասարկվել է Կայազորային հոսպիտալի տարածքը սպասարկող ալեհավաքով, մեկ այլ զանգ էլ սպասարկվել է Չարենցի 1 հասցեում տեղակայված ալեհավաքով:
Այս զանգերի առնչությամբ էլ պաշտպան Ասլանյանը մանրամասներ չասաց, նշեց. «Չեմ ուզում իմ քարտերը բացել, դա իմ ռազմավարությունն է, առարկությունն ու փաստարկները հաջորդ նիստին կներկայացնեմ»:
Պաշտպանն ասաց, որ հաջորդ դատական նիստի օրը դեռ պարզ չէ, այն պետք է կողմերի հետ համաձայնեցնեն:
Նելլի ԲԱԲԱՅԱՆ
