«Քրեական դատավարության օրենսգրքում փոփոխություններ եւ լրացումներ կատարելու մասին» օրինագիծը, որը ներկայումս հանրային քննարկման է դրված, մի շարք վտանգավոր դրույթներ է պարունակում՝ կապված անձանց պաշտոնավարման ժամանակավոր դադարեցման հետ: «Այլընտրանքային նախագծեր խումբ» հ/կ-ի եւ «Իմ Ձայնը» հ/կ-ի նախաձեռնած՝ «ՀՀ իրավական մարտահրավերները» խորագրով քննարկման ընթացքում այսօր այսպիսի կարծիք հայտնեց «Իրավական ուղի» հ/կ համահիմնադիր, իրավապաշտպան Ռուբեն Մելիքյանը: Նա օրինագիծը որակեց որպես անձի իրավունքները ոտնահարող նախաձեռնություն, որն ընդունվելու դեպքում տարածվելու է նաեւ մասնավոր անձանց վրա:
https://www.facebook.com/aravot.am/videos/1289005384612833/
«Որեւէ քրեական գործի շրջանակում պետությունը կարող է որոշել, որ որեւէ պաշտոնատար անձ ժամանակավորապես չպետք է աշխատի: Այսօր դա միայն վերաբերում է հանրային ծառայողներին. օրինակ, որեւէ վարչության պետը, որը պետական ծառայող է եւ կարող է խոչընդոտել գործի քննությանը, քննիչի որոշմամբ դադարեցնում է պաշտոնավարել: Դրա դասական դրսեւորումը Դավիթ Սանասարյանի դեպքն է: Հիմա այն տարածվելու է մասնավոր ընկերությունների վրա եւս: Քողարկված ձեւով ամրագրված է նաեւ, որ օրենքը վերաբերելու է նաեւ այն պաշտոնատար անձանց, որոնք չունեն վերադաս: Մինչդեռ գործող կարգավորումը վերաբերում է նրանց միայն, ովքեր ունեն վերադաս»,-նշեց Ռուբեն Մելիքյանը:
Լուիզա ՍՈՒՔԻԱՍՅԱՆ
