«Հիմա ի՞նչ է, հայհոյանքների դեմը չենք կարո՞ղ առնել: Հայհոյանքը որեւէ անձի հանդեպ ՀՀ-ի դեմ ուղղված հայհոյանք է: Եթե մենք կիրթ հասարակություն ենք, ուրեմն՝ այսօրվանից պետք է վերջ դնել այն երեւույթին, որն աղավաղում է ՀՀ-ի եւ հայ ժողովրդի պատկերը: Դիմում եմ ԱԺ բոլոր պատգամավորներին՝ կոչ անելով, որ օր առաջ արտահայտվեն եւ կոչ անեն վերջ դնել այս երեւույթին»,-«Այլընտրանքային նախագծեր խումբ» հ/կ-ի եւ «Իմ Ձայնը» հ/կ-ի նախաձեռնած՝ «ՀՀ իրավական մարտահրավերները» խորագրով քննարկման ընթացքում այսօր հայտարարեց ՀՀ առաջին օմբուդսման, իրավապաշտպան Լարիսա Ալավերդյանը:
https://www.facebook.com/aravot.am/videos/477095072882989/
Նա խոսք հղեց հատկապես «Իմ քայլը» խմբակցության պատգամավորներին. «Հորդորում եմ չսպասել, որ դա անի իրենց առաջնորդը: Մարդու իրավունքների ազատ արտահայտվելուն չխանգարելը ենթադրում է, որ պետք է լինի ազատ արտահայտվող անձ: Հիմա այդ երեւույթն արվում է հաճույքով, ցուցադրական եւ որպես դաստիարակություն՝ ուղղված հասարակությանը: Հանրային գիտակցությանն ուզում են սովորեցնել՝ այս ամենը կարող է տեղի ունենալ, որովհետեւ հեղափոխական անհրաժեշտություն է: Մինչդեռ համոզված եմ, որ եթե չդիմադրենք իրավունքների «հաճույքով» ոտնահարումներին, պետք է խոստովանենք, որ նախորդ երեսուն տարվա աշխատանքը չենք կարողանում գնահատել»:
Լուիզա ՍՈՒՔԻԱՍՅԱՆ
