«Իրազեկ քաղաքացիների միավորում » հ/կ համակարգող Դանիել Իոաննիսյանը դեռ չի ծանոթացել ԱԱԾ նախկին պետ Արթուր Վանեցյանի դեմ քրեական գործ հարուցելու մասին իր բողոքը մերժելու դատարանի որոշման հիմքերին: Նա մեզ հետ զրույցում ասաց, որ մերժման հիմքերին ծանոթանալուց հետո կմեկնաբանի, թե հիմնավո՞ր է համարում դատարանի մերժումը, թե՝ ոչ, ինչպես նաեւ հիմքերին ծանոթանալուց հետո կորոշի՝բողոքարկե՞լ դատարանի որոշումը, թե՝ ոչ:
Հիշեցնենք, որ դատարանն այսօր դատավոր Կարեն Ֆարխոյանի նախագահությամբ որոշեց մերժել «Իրազեկ քաղաքացիներ» միավորման ծրագրերի համակարգող Դանիել Իոաննիսյանի բողոքը՝ անհիմն լինելու պատճառաբանությամբ:
Իսկ Դանիել Իոաննիսյանը բողոքարկել էր ՀՔԾ-ի այն որոշումը, որով ԱԱԾ նախկին տնօրեն Արթուր Վանեցյանի դեմ քրեական գործ չէր հարուցվել։ Բողոքի հիմքում Գարեգին Միսկարյանի այն գրառումն էր, որտեղ նշվել էր, որ Արթուր Վանեցյանի ընտանիքը ծաղկի բիզնես ունի: Այս գրառումից հետո քաղաքացին ԱԱԾ-ից հենց ԱԱԾ բլանկով ծանուցում էր ստացել, որով պահանջում էին, որ նա հերքի իր գրառման մեջ տեղ գտած տեղեկությունը:
Դանիել Իոաննիսյանը չի բացառում, որ իրենց բողոքը մերժելու հրահանգ կարող էր լինել դատարանին, բայց եւ չի կարողանա ասել՝ ում կողմից է այն հնարավոր: Նա ասաց՝ չի ճանաչում որոշում հրապարակած դատավորին ու չի ցանկանում խախտել նրա անմեղության կանխավարկածը:
Կարդացեք նաև
Արփինե ՍԻՄՈՆՅԱՆ
