«Դա անմիջապես պոչամբարից չէր, Զանգեզուրի պղնձամոլիբդենային կոմբինատից դեպի Արծվանիկի պոչամբար գնացող խողովակաշարի վթարից արտահոսք է եղել, եւ հոսքաջրերը լցվել են Ողջի գետը»,-կառավարության նիստից հետո լրագրողների հետ զրույցում իրավիճակն այսպես ներկայացրեց Շրջակա միջավայրի նախարար Էրիկ Գրիգորյանը:
Այսօր կառավարության նիստում վարչապետ Նիկոլ Փաշինյանը հայտնել էր, որ Սյունիքի մարզում արտակարգ իրավիճակ է ստեղծվել. պոչամբարից արտահոսքի հետեւանքով ջրերը լցվում են Ողջի գետը: Ավելի ուշ, ըստ Էրիկ Գրիգորյանի, պարզ դարձավ, որ դեպի պոչամբար գնացող Քաջարանի կոմբինատի խողովակաշարից է արտահոսքը տեղի ունեցել:
Մանրամասները՝ տեսանյութում
Կարդացեք նաև
Նախարարի խոսքով՝ Տեսչական մարմինը տեղում փորձանմուշներ է վերցրել: Ըստ նրա, այս պահին դեռ հայտնի չէ շրջակա միջավայրին հասցված վնասի չափը: Նա ասաց, որ աղտոտման ծավալները եւ վնասի աստիճանի մասին տեսչական մարմինը հայտարարություն կանի:
Էրիկ Գրիգորյանի խոսքով. «Բնապահպանական օրենսդրությամբ ջրի աղտոտման համար վնասների փոխհատուցման շատ ծիծաղելի չափեր են նախատեսված: Այժմ մենք վերանայում ենք այդ համակարգը, մի քանի պատիկներով ավելացվելու է: Նախկինում էլ եղել են վթարներ, հաշվարկել են վնասը, ասենք, 500 հազար դրամ, եւ դրանով փակվել է»:
Հարցին՝ ի՞նչ քանակությամբ ջուր է հասել, եւ արդյո՞ք վտանգը վերացել է խողովակի զոդումից հետո, նախարարը պատասխանեց՝ իմ կարծիքով փակ խողովակից այլեւս չի հոսի:
Նախարարը հայտնեց նաեւ, որ նման վթարներ պարբերաբար լինում են, որոնց պատասխանատուն տնտեսվարողն է:
Լուսինե ԲՈՒԴԱՂՅԱՆ
