Երևան քաղաքի Աջափնյակ և Դավթաշեն վարչական շրջանների ընդհանուր իրավասության դատարանում (նախագահող դատավոր Նաիրա Ավետիսյան) տեղի ունեցավ Փաստաբանների պալատի անդամ, փաստաբան Տիգրան Աթանեսյանի ընդդեմ ՀՀ փաստաբանների պալատի գործով դատական նիստ:
Նիստի ընթացքում Տիգրան Աթանեսյանի արտոնագիրը դադարեցնելու մասին ՀՀ փաստաբանների պալատի խորհրդի որոշման դեմ գործով վարույթը կասեցվեց: Այս առիթով Տիգրան Աթանեսյանը Aravot.am-ի հետ զրույցում պարզաբանեց. «Այդ գործի վարույթը կասեցվեց, քանի որ մենք ներկայացրել ենք մեկ այլ հայցադիմում կարգապահական այդ վարույթը հարուցելու որոշման դեմ»:
Հիշեցնենք՝ Տիգրան Աթանեսյանը բողոքարկում է իր արտոնագրի գործողությունը կասեցնելու վերաբերյալ 2018 թվականի օգոստոսի 11-ին ՀՀ փաստաբանների պալատի խորհրդի կայացրած որոշումը, ըստ որի՝ Տիգրան Աթանեսյանը մեղավոր է ճանաչվել «Փաստաբանության մասին» ՀՀ օրենքի 19-րդ հոդվածի 2-րդ կետի և Փաստաբանի վարքագծի կանոնակարգի 2.2.3 ենթակետի խախտումների համար, իսկ որպես կարգապահական տույժ դադարեցվել է փաստաբանի (թիվ 78) արտոնագրի գործողությունը:
Տիգրան Աթանեսյանի նկատմամբ կարգապահական վարույթը հարուցվել էր հրապարակային հարթակներում փաստաբանի կողմից վիրավորական գրառումներ (արտահայտություններ) և հայհոյանքներ կատարելու, ինչպես նաև կատարված հայհոյանքները և վիրավորական գրառումները կամ արտահայտություններն արդարացնելու և հրապարակային հարթակում նույն վարքագիծը շարունակելու վարքագիծը ստուգելու նպատակով:
Կարդացեք նաև
Տիգրան Աթանեսյանն այս առիթով մեզ հետ զրույցում պնդեց. «Կարգապահական վարույթը հարուցվել է օրենքի կոպիտ խախտումներով: Քանի որ կա երկրորդ գործ, առաջին գործը կասեցվեց, մինչև երկրորդով կայացվի վերջնական դատական ակտ: Փաստաբանների պալատի խորհրդի որոշումն էլ ենք վիճարկում, կարգապահական վարույթ հարուցելու հարցն էլ»:
Մեր այն հստակեցմանը՝ մասնավորապես ի՞նչն են վիճարկում, Տիգրան Աթանեսյանը պատասխանեց. «Կարգապահական վարույթը հարուցվել է ոչ պատշաճ դիմումի հիման վրա»:
Այս գործով հաջորդ դատական նիստը տեղի կունենա դեկտեմբերին:
Տաթև ՀԱՐՈՒԹՅՈՒՆՅԱՆ
