Սպորտային մարմնամարզության Հայաստանի ազգային հավաքականի գլխավոր մարզիչ Հակոբ Սերոբյանն այսօր լրագրողների հետ հանդիպման ժամանակ ամփոփելով Շտուտգարտում կայացած աշխարհի առաջնությունում իր սաների մասնակցությունը՝ նշեց, որ գոհ է նրանց մասնակցությունից, իսկ առաջնային նպատակը Տոկիոյի օլիմպիական խաղերի ուղեգիր նվաճելն էր:
«Ամեն ինչ ընթացավ ըստ նախապես կազմված պլանի՝ Արթուր Դավթյանը հենացատկում օլիմպիական վարկանիշ նվաճեց: Իսկ Արթուր Թովմասյանը կարող էր նաեւ ոսկե մեդալակիր դառնալ, եթե վարժության ավարտին ավելորդ քայլ չաներ», – ասաց պարոն Սերոբյանը: Մարզչի կարծիքով, մարզիկը ավելի վաղ ստացած վնասվածքից հետո մի տեսակ վախի զգացողություն ունի, որը չի կարողանում հաղթահարել եւ գուցե հոգեբանական աջակցության կարիք ունի:
Օլիմպիական եւս մեկ ուղեգիր նվաճելու հնարավորություն էլի կա, սակայն դա ամենայն հավանականությամբ մեր համար չէ, քանի որ Եվրոպայի առաջնությունը անցկացվելու է Բաքվում, ուր մեկնելը գրեթե բացառվում է: Ինչ վերաբերում է Ավստրալիայի տարբերակին, դա շատ անհարմար եւ ծախսատար է: «Նոյեմբերի վերջին Գերմանիայի Կոտբուս քաղաքում կայանալու է աշխարհի գավաթի խաղարկության վերջին փուլը, որին մասնակցելու ենք: Եթե այնտեղ հաղթենք, դրանից հետո միայն կարելի կլինի նաեւ Ավստրալիա եւ Քաթար մեկնել եւ օլիմպիական երկրորդ ուղեգիրն էլ փորձել նվաճել»,- եզրափակեց մարզիչը:
Աշոտ ՀԱԿՈԲՅԱՆ
