Առաջնային շուկայից տուն կամ բնակարան ձեռքբերելիս հիփոթեքային վարկի դեպքում եկամտային հարկի վերադարձի օրենսդրական փոփոխության մասին վերջերս հաճախ է խոսվում, կա կարծիք, որ այս դրույթը կառավարությունը մտադիր է վերացնել:
Այսօր ՊԵԿ նախագահ Դավիթ Անանյանը լրագրողների հետ հանդիպմանն ասաց՝ հիփոթեքային վարկը սպասարկելիս եկամտային հարկի վերադարձի նպատակահարմարության հարց այժմ կառավարությունում չի քննարկվում, բայց ՊԵԿ նախագահը մտադիր է այդ խնդիրն առաջադրել. «Որեւէ հարց այսօր չի քննարկվում կառավարությունում, այդպիսի մտադրություն չկա, բայց կառավարությունում ես ինքս այդպիսի հարց անպայման բարձրացնելու եմ՝ մենք ի զորո՞ւ ենք այս բեռը առաջիկա տարիներին տանել մեր ուսերին: Իմ կարծիքով՝ մի քիչ դժվարություններ կլինեն»:
Անանյանն ասաց՝ պետք է դիտարկել՝ սա սոցիալական աջակցությանն ուղղված գործի՞ք է, թե՞ բիզնեսին աջակցելու, եթե՝ սոցիալական է, ապա պետք է գործի այդ գործիքը: Իսկ եթե բիզնեսին՝ ապա դա լավ գործիք չէ, եւ այն բիզնեսը չէ, որին պետությունը պետք է աջակցի, քանի որ կան այլ ոլորտներ, օրինակ՝ արտահանմանը միտված ճյուղեր, որտեղ պետությունը այդ գումարներն ավելի արդյունավետ կարող է ծախսել:
««Եկամտային հարկի վերադարձի մասին» օրենքով արդեն 5 միլիարդ 501 միլիոն դրամ մենք ենք վերադարձրել ֆիզիկական անձանց: Իսկ մինչեւ տարեվերջ, ՊԵԿ կանխատեսումներով, վերադարձվող գումարը կլինի շուրջ 8 միլիարդ դրամ»,-ասաց Անանյանը:
Կարդացեք նաև
Նա նաեւ նշեց՝ պետք է դիտարկել՝ բնակարանի գնի մինչեւ 55 միլիոն դրամն արդյոք այն լավագույն շեմն է, որի դեպքում եկամտային հարկի վերադարձ է կատարվում. «Իմ կարծիքով՝ ոչ, այդ շեմն իմ կարծիքով պետք է լինի 35 միլիոն դրամ»:
Այս ծրագրի արդյունքում, ինչպես ասաց Անանյանը, բիզնեսի հետ գործարքներից ավելի քիչ գումար է բյուջե մտնում, մինչդեռ ավելի շատ վերադարձնում են քաղաքացիներին՝ եկամտային հարկի տեսքով:
Նելլի ԲԱԲԱՅԱՆ
