Այսօր ՊԵԿ նախագահ Դավիթ Անանյանը լրագրողների հետ հանդիպմանն անդրադարձավ Գյումրիում անկախության տոնակատարություններին կասկածելի քիչ թվով ՀԴՄ կտրոններ տրամադրելու վարչապետի հայտարարությանը: ՊԵԿ նախագահն ասաց՝ սեպտեմբերի 21-ին՝ անկախության օրը ՀԴՄ կտրոնների վերաբերյալ վերլուծություններից հետո Շիրակի մարզի հարկայինի ղեկավարին փոխել են:
Ըստ Անանյանի, վարչապետի հանձնարարությամբ ուսումնասիրություն են կատարել սեպտեմբերի 6-9, սեպտեմբերի 13-15 եւ սեպտեմբերի 20-22-ին:
ՊԵԿ նախագահն ասաց, որ 3 հանգստյան օրեր համեմատել են եւ պարզել՝ օրինակ՝ ամսի 6-9 -ին առեւտրի, բենզալցակայանների, սննդի օբյեկտներում տպվել է 112 հազար 527 կտրոն՝ 381 մլն դրամ է հայտարարագրվել. «Իսկ ամսի 13-15-ին՝ 118 հազար կտրոն՝ 393 մլն դրամ, իսկ սեպտեմբերի 20-22-ին տպվել է 115 հազար կտրոն, 403 մլն է հայտարարագրվել: Մենք հետեւություն ենք արել՝ դա հարկային մարմինների թերացում է, բայց ավելի շատ ՀԴՄ կտրոն չտրամադրելու մշակույթ: Այս վերլուծություններից հետո մենք Շիրակի հարկայինի ղեկավարին փոխել ենք, կարծել ենք, որ ինքն էլ իր հերթին թերացել է իր ծառայությունը կատարելիս, բայց ավելի շատ մշակույթի պակասն է, որը պետք է ձեւավորվի»:
Նելլի ԲԱԲԱՅԱՆ
