«Հանրության մոտ թյուրըմբռնում կա, թե Գյումրիի ավտոմաքսատունն արդեն բացել ենք, բայց ոչ: Ավտոմաքսազերծման գործառույթը երեկվանից տեղափոխվել է Գյումրի: Ճապոնիայից եւ Վրաստանից ներկրվող մեքենաները երեկվանից ուղղորդվում են դեպի Հյուսիսային մաքսատուն: Սա պայմանավորված էր նրանով, որ նախանշված ժամկետները չխախտենք եւ երկու փուլով տեղափոխումն իրականացնենք»,- ԱԺ հանձնաժողովներից մեկի նիստում այսօր հայտարարեց Պետեկամուտների կոմիտեի նախագահ Դավիթ Անանյանը:
Նա պարզաբանեց՝ խնդիրն այն է եղել, որ շինարարությունն է ձգձգվել. «Իմ անձի հետ է կապված: Մասնագիտությամբ շինարար չեմ եւ ժամկետները նշելիս հաշվի չէի առել, որ, օրինակ, 800 ք/մ շենքային պլանը փոխվել եւ դարձել է 4500: Չվերանայեցի հոկտեմբերի 11-ը՝ համարելով, որ դա մարտահրավեր պետք է լինի նաեւ շինարարների համար: Կներեք, հոկտեմբերի 11-ը մասնագիտությամբ ոչ շինարար անձի նախանշած ժամկետ էր, որը վերանայվել է եւ դարձել հոկտեմբերի վերջ եւ նոյեմբերի սկիզբ»:
ՊԵԿ նախագահ Դավիթ Անանյանը վստահեցրեց, որ նոյեմբերին կունենանք շենքային հարմարություններով եւ արդիականացված լավ ավտոմաքսատուն: Անանյանը լրագրողների հետ զրուցել չցանկացավ՝ ասելով, որ հոկտեմբերի 16-ին մամուլի ասուլիսով է հանդես գալու:
Մանրամասն՝ տեսանյութում:
Կարդացեք նաև
https://www.facebook.com/aravot.am/videos/424179678237490/
Լուիզա ՍՈՒՔԻԱՍՅԱՆ
