Հոկտեմբերի առաջին տասնօրյակն Արցախում առանձնացավ գյուղոլորտում եղած հարուստ իրադարձություններով: Կազմակերպվեց չորս փուլից բաղկացած գիտագործնական կոնֆերանս՝ «Գյուղատնտեսության ներկան և ապագան» խորագրով, որ աննախադեպ էր հանրապետության գիտատնտեսական կյանքում, ինչին հաջորդեց կիրակի օրը Ստեփանակերտի Վերածննդի հրապարակում անցկացված՝ արդեն ավանդական Բերքի տոնը, որը նվիրված է գյուղատնտեսության աշխատողի օրվան և իրենից ներկայացնում է գյուղատնտեսական բարիքների հսկայական ցուցահանդես-տոնավաճառ:
Այս տարի ևս միջոցառումը կազմակերպվեց մեծ շուքով և առանձնացավ նրանով, որ նրան մասնակցեցին ՀՀ յոթ մարզեր:
Առավոտից Ստեփանակերտի Վերածննդի հրապարակում ու նրան հարակից փողոցներում տեղադրված ավելի քան հինգ հարյուր տաղավարներում Արցախն ու ՀՀ-ն ներկայացնող հազարից ավելի տնտեսավարողներ ներկայացրել էին իրենց արտադրանքը. մեր լեռնաշխարհին հատուկ բոլոր կենդանատեսակների մսամթերքից մինչև մեղր ու պանիր, տարատեսակ մրգեղենից ու բանջարեղենից մինչև թեյախոտեր ու չրեղեն, խմիչքներ և հյութեր:
Կարդացեք նաև
Ժամը 11-ին ԱՀ պետական նախարար Գրիգորի Մարտիրոսյանի, կառավարության անդամների և օտարերկրյա հյուրերի հետ տոնավաճառ այցելեց ԱՀ նախագահ Բակո Սահակյանը: ՀԱԵ Արցախի թեմի առաջնորդ Պարգև արքեպիսկոպոս Մարտիրոսյանն օրհնեց Բերքի տոնն ու հողի մշակին, ինչից հետո նախագահն ու նրան ուղեկցող անձինք շրջել են տաղավարներով և ծանոթացել ներկայացված գյուղմթերքների տեսականուն: Ավանդույթի համաձայն, մասնակիցներին խրախուսելու համար շնորհվում են մրցանակներ տարբեր անվանակարգերում: «Լավագույն շրջան» անվանակարգում հաղթող է ճանաչվել Քաշաթաղի շրջանը, իսկ «Լավագույն մշակութային ներկայացում» անվանակարգում հաղթող է ճանաչվել Շուշիի շրջանը: «Լավագույն ցուցադրական սեղան» անվանակարգում հաղթել է Ասկերանի շրջանը, «Ցածր գին» անվանակարգում՝ Հադրութի շրջանի Խծաբերդ, Մարտունու շրջանի Բերդաշեն և Քաշաթաղի շրջանի Սարատակ համայնքները:
Տոնավաճառում «Հատուկ մրցանակ»-ի են արժանացել ՀՀ Արագածոտնի և Լոռու մարզերը:
Կարեն Միրզոյան
