ՀՀ վարչական դատարանը վարույթ է ընդունել Արարատ մարզի Նորաշեն համայնքի լիազորությունները վաղաժամ դադարեցված ղեկավար Նորայր Գրիգորյանի հայցը: Դատալեքս տեղեկատվական համակարգի համաձայն՝ Նորայր Գրիգորյանը դատական հայց է ներկայացրել ընդդեմ Նորաշեն համայնքի ավագանու, ՀՀ Արարատի մարզպետ Գարիկ Սարգսյանի: Համայնքի նախկին ղեկավարը պահանջում է անվավեր ճանաչել Արարատի մարզի Նորաշեն համայնքի ավագանու 2019 թ. սեպտեմբերի 10-ի արձանագրությունը, որպես ածանցյալ պահանջ վերացնել ՀՀ Արարատի մարզպետի սեպտեմբերի 27-ի թիվ ՄԿ-220-2019 կարգադրությունը: Որպես երրորդ անձ ներգրավվել է ՀՀ տարածքային կառավարման և ենթակառուցվածքների նախարարությանը:
Հոկտեմբերի 10-ին հրապարակված որոշման մեջ արձանագրված է. «Դատարանն արձանագրում է, որ համաձայն Հայաստանի Հանրապետության վարչական դատավարության օրենսգրքի 83-րդ հոդվածի 1-ին մասի` վիճարկման հայցի վարույթ ընդունելը կասեցնում է վիճարկվող վարչական ակտի կատարումը մինչև այդ գործով գործն, ըստ էության, լուծող դատական ակտի օրինական ուժի մեջ մտնելը»:
Հետևաբար` Նորայր Գրիգորյանը կշարունակի պաշտոնավարել:
Կարդացեք նաև
Հիշեցնենք, որ մարզպետի կարգադրությամբ Նորաշեն համայնքի ղեկավարի պաշտոնակատար է նշանակվել Արտակ Հարությունյանը:
Օրեր շարունակ Նորաշեն համայնքի մի խումբ բնակիչներ բողոքի ցույցեր էին անում՝ մարզպետ Գարիկ Սարգսյանից պահանջելով վերականգնել Նորայր Գրիգորյանին համայնքապետի պաշտոնում:
Նշենք, որ այս գործով դատական նիստը նշանակվել է 2020 թվականի փետրվարի 4-ին:
Տաթև ՀԱՐՈՒԹՅՈՒՆՅԱՆ
