Հոկտեմբերի 14-ից մեկնարկել է «Ավրորա» ֆորումը, որի շրջանակում էլ` ChainPoint19 բլոկչեյնի միջազգային համաժողովը: ChainPoint19 բլոկչեյնի միջազգային համաժողովը հյուրընկալել է Nooor բլոկչեյնի հայկական ասոցիացիան: Այն հավակնում է լինել Կովկասում անցկացվող բլոկչեյնի ամենամեծ միջազգային համաժողովը, որը միավորում է բլոկչեյնի գլոբալ առաջնորդներին: Համաժողովն անցկացվում է Հայաստանում, որովհետեւ Հայաստանը դարձել է զարգացող տեխնոլոգիաների, տեղեկատվական և հեռահաղորդակցային տեխնոլոգիաների ոլորտում գործող ընկերությունների և հավակնոտ ստարտափերի նոր հանգրվան:
Aurora մրցանակաբաշխության համահիմնադիր եւ MIT հոգաբարձուների խորհրդի անդամ Նուբար Աֆեյանը լրագրողների հետ զրույցում ասաց, որ թեեւ Հայաստանը փոքր եւ աղքատ երկիր է, սակայն տեխնոլոգիական առումով մեծ ներուժ ունի: Աֆեյանի խոսքով, Սփյուռքն ու Հայաստանի ամուր կապի միջոցով կարելի է հաջողությունների հասնել ոլորտում, որովհետեւ նրա խոսքերով, Սփյուռքն առանձին չի կարող ուժեղ լինել, ուստի պետք է ամեն ջանք գործադրել լավագույն մասնագետներին Հայաստան բերելու համար:
Ինչ վերաբերում է բլոկչեյն տեխնոլոգիային, Նուբար Աֆեյանն ասաց, որ դրա հետ առնչվում է Մասաչուսեթսի տեխնոլոգիաների ինստիտուտի`MIT-ի միջոցով, որտեղ 16 տարի դասավանդում է այդ թեմայով: Ասաց, որ հետաքրքրված է բլոկչեյն տեխնոլոգիան տնտեսության տարբեր ճյուղերում օգտագործելու ուղղությամբ: «Ինչպես անենք, որ ամենաշատ կարիք ունեցող ժողովուրդը ստանա օգնություն, դա դառնա թափանցիկ եւ կառավարությունները, որ օգնում են իրենց ժողովուրդներին, կոռուպցիայից դուրս գան: Բլոկչեյնը այն տեխնոլոգիան է, որ այդ ամենում շատ կարեւոր դեր կարող է խաղալ»,-ասաց պարոն նա ու որոշ «փակագծեր» բացեց:
Մանրամասն` տեսանյութում
Կարդացեք նաև
Պատասխանելով լրագրողների հարցերին` Նուբար Աֆեյանը նշեց, որ տեղյակ չէ Հայաստանում բլոկչեյնի օգտագործմամբ, դրա ուսումնասիրությամբ չի զբաղվել, բայց քանի որ բանկային համակարգը կայացած է Հայաստանում, կարծում է, որ բլոկչեյնը այստեղ կարող է հաջողություն ունենալ. «Բլոկչեյնը տեխնոլոգիա է, որը ինֆորմացիոն կապերը եւ փոխանցումները վստահելի է դարձնում, բլոկչեյն տեխնոլոգիայով դժվար է խարդախություն անել»:
Նա կրիպտոարժույթներին եւ բիթքոինին էլ անդրադարձավ: Վերջինիս մասին ասաց. «Դա ընդհանրապես եղել է ղումարի մեթոդ որոշ երկրներում, ու չգիտեմ, թե Հայաստանում ինչպես է օգտագործվում»:
Գոհար ՀԱԿՈԲՅԱՆ
